Kryeministri Edi Rama është shpesh herë pjesë e diskutimeve publike edhe për veshjen e tij dhe është kritikuar gjithmonë për këtë fakt. Rasti i fundit ishte në samitin e Trieste, ku kryeministri shqiptar i veshur me kostum, kishte zgjedhur një palë atlete të bardha. Por veshja e tij ka marrë vëmendje jo vetëm brenda Shqipërisë por edhe të liderëve të pranishëm në samit. Në një intervistë për “In TV”, Rama ka treguar se edhe presidentit të Francës Emannuel Macron-it i kanë bërë shumë përshtypje atletet e tij, ndaj i ka kërkuar një palë si ato. Dhe Rama sigurisht që ia ka realizuar dëshirën.
“Mund t’ju zbuloj edhe një sekret të vogël, meqë është edhe hera e parë që vij këtu në emisionin tuaj, që presidentit të Francës i çova një palë atlete meqë i pëlqyen shumë atletet e mia dhe më tha ‘Dua edhe unë një palë si këto’. Do këto i thashë apo një palë si këto. ‘Jo, si këto’ më tha ‘sepse këto s’më bëjnë’. Sa e ke numrin, 44-tha. Shumë mirë i thashë dhe i çova një palë atlete, dhe ai u gëzua.”, tregoi Rama. Ndër të tjerash, kryeministri zbuloi se 46-të ishte numri i tij i këmbës.
(i.ç/BalkanWeb)
