Drejtori i klubit të Luftëtarit, Gentian Nora, i ftuar në emisionin “Fair Play” në “News 24” ka zbuluar premtimin e çmendur të presidentit të gjirokastritëve në rast se klubi arrin të marrë pjesë në kupat e Europës.

Nora është shprehur se në rast se Luftëtari arrin të marrë pjesë në garat Europiane, çdo futbollist do përfitojë një shpërblim prej 20 mijë eurosh.

Duhet theksuar se shumë të tilla janë të padëgjuara për kampionatin si dhe janë të denja edhe për ligat në zë të Europës. Pas këtij premtimi padyshim që lojtarët e Luftëtarit do motivohen dyfish për të ruajtur vendin e katërt në renditje, por duhet theksuar se edhe në këtë rast nuk është e sigurtë pjesëmarrja.

Mundësia e vetme që Luftëtari të marrë pjesë në “Europa League” është t’a mbyllë kampionatin në vendin e katërt si dhe njëkohësisht të shpresojë që Tirana të mos jetë fituesja e Kupës së Shqipërisë.

Në rast të kundërt do jenë bardheblutë ata që do i zënë vendin Luftëtarit.

(e.k/BalkanWeb)