BRUKSEL – Identifikohet personi i dyshuar për vendosjen e një bombe në stacionin qendror të Brukselit mbrëmjen e së enjtes. Ai është një 36-vjeçar maroken dhe vjen nga një lagje e qytetit që është bërë e famshme për numrin e xhihadistëve që kanë jetuar atje.
Lajmi u bë i ditur nga ministri i Brendshëm, i cili tha se terroristi është 36-vjeçari maroken Oussama Zariouh, i divorcuar dhe i dënuar më parë për drogë.
“Të martën në mbrëmje mund të kishte ndodhur një tragjedi, sepse agresori kishte me vete dhe një tjetër bombë me gozhdë, e cila fatmirësisht nuk shpërtheu”, tha ministri i Brendshëm në një radio belge.
“I dyshuari është nga Molenbeeku dhe mbante një bombë artizanale me gozhdë dhe bombola gazi”, thanë zyrtarët. Ai u qëllua dhe më pas humbi jetën në shpërthimin që u trajtua si sulm terrorist. “Ai ishte i njohur për policinë, por nuk ishte lidhur më parë me terrorizmin”, shkruan “Independent”.
Prokurori Erik Van der Sypt tha se, i dyshuari i identifikuar si Oussama Zariouh i ishte afruar një grupi pasagjerësh nën platformën kryesore dhe ishte përpjekur të hidhte në erë valixhen e tij.
Ajo shpërtheu pjesërisht dhe mori flakë, para se të shpërthente për të dytën herë. Autori më pas kishte vrapuar drejt një punonjësi të stacionit, e kishte marrë në shënjestër edhe një ushtar, duke thirrur “Allahu Akbar”, para se të qëllohej.
Ai vdiq më pas nga plagët, ndërsa në shtëpinë e tij në Molenbeek nisën operacionet e kontrollit nga forcat speciale. Pas një takimi të kabinetit të sigurisë, kryeministri i vendit tha se ishin marrë masa shtesë sigurie për të siguruar stacionet, vendet publike dhe shfaqjet e planifikuara.
(er.cu/BalkanWeb)