TIRANË– Pasi kryeministri Edi Rama i la edhe 48 orë kohë Partisë Demokratike duke i lënë derën e hapur kreut të saj, ka ardhur edhe përgjigjja e Lulzim Bashës. Ai thotë se e vetmja gjë që nuk ka blerë dot Rama është Partia Demokratike, duke e quajtur shtirje ftesën e kryeministrit. Basha nuk tërhiqet nga qëndrimi i deritanishëm për të mos hyrë në zgjedhje dhe deklaron se PD ka zgjedhur lirinë dhe demokracinë e vërtetë dhe se nga kjo betejë do të dalë më e fortë dhe Shqipëria do ketë “Republikën e Re”.
“E gjithë karriera e Edi Ramës është ngritur mbi blerjen e të gjithëve dhe çdo gjëje, të partisë, të aleatëve, të partnerëve, të bizneseve, të mediave, të shoqërisë civile. Me zhagen e lejeve të ndërtimit, të koncesioneve, të favoreve, të parave publike, Edi Rama ka blerë rrugën e tij deri në majën e pushtetit.
E vetmja që nuk ka blerë dot ndonjëherë Edi Rama ka qenë Partia Demokratike. Dje pasi mbylli edhe pazaret e fundit me ata që shiten dhe blihen, pasi bëri një listë kandidatësh me deputetë pasuria e të cilëve e kalon edhe prodhimin kombëtar të Shqipërisë, Edi Rama kuptoi se prapë nuk mund të blejë dot pluralizmin dhe demokracinë, sepse demokratët e vërtetë nuk u shitën. Ndaj me dinakërinë e tij të zakonshme sot u shtir sikur ka hallin e Partisë Demokratike.
Partia Demokratike ka zgjedhur lirinë, pluralizmin dhe demokracinë e vërtetë. Kjo është kauza e drejtë, ky është shërbimi më i madh për popullin dhe për të ardhmen e Europiane të Shqipërisë. Partia Demokratike do të dalë më e fortë nga kjo betejë, ndërsa Shqipëria do të ketë Republikën e Re, të vërtetë dhe perëndimore”, deklaron Basha.
(m.k/BalkanWeb)
