Të shtunën më 26 gusht me shumë mundësi do të harrohen të gjithë sportet e tjera pasi vëmendjen do t’a ketë boksi. Në këtë sfidë nuk përballën dy boksier të zakonshëm, por një sportist i tërhequr si Mayweather i cili ka bërë historinë dhe kampioni aktual i MMA (Mixed Martial Arts) McGregor.

Takimi mbahet në Las Vegas, në “T-Mobile Arena” dhe me shumë mundësi i pranishëm do të jetë dhe presidenti i Amerikës, Donald Trump. Lajmin e bëjnë të ditur mediat amerikane të cilët theksojnë se presidenti nuk do të jetë vetëm, por bashkë me familjen e tij, për të ndjekur nga afër këtë përballje që ka bërë të gjithë botën të flasë.

Ka qenë Leonard Ellerbe, një nga njerëzit më të afërt të “Mayweather Promotions” ai që ka konfirmuar lajmin e pranisë së Trump: “Nuk e kam ftuar personalisht Donald Trump, por më kanë thënë që në tavolinën e tij është një ftesë. Nuk e di nëse do të vijë. Gjithsesi, ky mbetet një event i madh, që të gjithë duan ta ndjekin”, tha ai.

Gjithsesi, i vërtetë apo jo lajmi, do të jetë apo jo i pranishëm në Las Vegas më 26 gusht, kjo mbetet për t’u zbuluar. Por presidenti i Amerikës është një fans i eventeve të mëdha sportive, ku merr pjesë shpesh, madje ka qenë i pranishëm në disa duele të mëdha boksi. Donald Trump, së bashku me bashkëshorten e tij Melania, kanë qenë të pranishëm në “sfidën e shekullit” mes Mayweather dhe Pacquiao, të zhvilluar në maj të vitit 2015. Trump është edhe një mik i ngushtë i presidentit të UFC-së, Dana White, pasi e ka promovuar këtë sport në fillimet e tij. White ka mbështetur Trump gjatë zgjedhjeve për president të Amerikës.

(e.k/BalkanWeb)