JALE- Presidenti i zgjedhur, Ilir Meta ka folur sot për herë të parë pas zgjedhjeve parlamentare të 25 qershorit. Nga Jala, ku të rinjve socialistë janë mbledhur në kampingun veror për “IUSY World Festival 2017”, ai ka përcjellë edhe mesazhin e tij.
Meta, i cili u prit me ovacione nga të rinjtë e LRI-së, u ka kërkuar atyre që të forcojnë lidhjet me të rinjtë eurosocialistë për të shkëmbyer eksperiencat e nevojshme.
“Dua t’ju them se jeta ime politike lidhet me rininë. Kështu që unë ju kërkoj të forconi lidhjet mes të rinjve eurosocialistë sepse vetëm në këtë mënyrë edhe bota, edhe Europa, edhe Shqipëria do të kenë ndryshime pozitive. Kërcënimet globale kërkojnë ndërgjegjësim më të madh të të rinjve për t’i fituar këto sfida që rrezikojnë të ardhmen e njerëzit”, tha Meta.
Kampi i “IUSY World Festival 2017”, do të mbahet për 4 ditë rresht në Jalë, ku të rinjtë e LRI kanë mirëpritur 400 të huaj. Mbrëmjen e sotme në Jalë ishte edhe kryetarja e re e LSI, Monika Kryemadhi.
Kujtojmë se Ilir Meta do të betohet president më 24 korrik.
FJALA E PLOTË E ILIR METËS
Mirëmbrëma IUSY,
25 vite më parë, në udhëtimin tim të parë jashtë Shqipërisë, në vendin më të izoluar në Evropë, pata fatin të shkoja në Danimarkë.
Ishte një seminar për demokracinë, por unë kisha vetëm në qëllim në mendjen time, për të vendosur kontakte me të rinjtë socialdemokrat danez.
Dhe përmes takimit më në fund me të rinjtë socialdemokrat danez, gjatë asaj vizite unë pata mundësinë të takohesha edhe me anëtarin e byrosë së IUSY dhe nga ai moment lidhja ime me IUSY ka qenë e jashtëzakonshme, por edhe e IUSY-t me Shqipërinë.
IUSY ka dhënë një kontribut të jashtëzakonshëm për demokracinë në Shqipëri dhe për social demokracinë. Shumë president të IUSY kanë vizituar Shqipërinë në fillim të viteve 90 dhe në vazhdim, por natyrisht që Howard do të mbetet një president shumë i dashur për të gjithë sepse është i pari që është zgjedhur në Shqipëri.
IUSY ka dhënë një kontribut të veçante për të zhvilluar demokracinë në vendin tonë, dhe për të mbështetur në mënyrë të veçantë rininë eurosocialiste.
Ajo që dua të them është se e gjithë jeta ime politike lidhet me të rinjtë. Dhe shpresoj të kem bërë më të mirën duke mbështetur të rinjtë që të jenë sa më aktiv në politikë, por padyshim që e ardhmja ka sfida shumë më të mëdha sot se sa përpara disa vitesh dhe të rinjtë tanë kanë dy rrugë: ose do të jenë protagonist të ndryshimeve pozitive, ose do të jenë viktima të këtyre ndryshimeve nëse nuk do të marrin pjesë në këto ndryshime.
Ndaj unë ju kërkoj të gjithëve të forconi IUSY-in, të forconin bashkëpunimin midis të rinjve kudo, edhe këtu në Shqipëri sepse vetëm në këtë mënyrë, edhe Bota edhe Evropa, edhe Shqipëria, dhe Rajoni ynë do të kenë ndryshime më pozitive për të rinjtë. Sepse kërcënimet globale kërkojnë edhe një soliditet në rritje dhe në radhë të parë një ndërgjegjësim më të madh të të rinjve për t’i fituar këto sfida të cilat rrezikojnë të ardhmen e njerëzimit.
Ndaj i urojë suksese IUSY-it dhe mendoj që ky ekip i mrekullueshëm i IUSY-it meriton një mbështetje më të madhe nga të gjitha forcat progresive në Evropë dhe në botë sepse pasioni i tyre mund të ndihmojë shumë për të rigjallëruar lëvizjen socialiste dhe social demokrate kudo.
Ishte kënaqësi për mua që të isha sot këtu dhe i urojë IUSY-it suksese për të ardhmen dhe të gjithë juve t’ia koloni sa më mirë këtu në Jalë.
Dhe të postoni sa më shumë fotografi nga Jala dhe nga e gjithë Shqipëria në vendet tuaja sepse kjo është shumë e rëndësishme për promovimin e Shqipërisë, të vendit tonë, por edhe të këtij aktiviteti që po ndodhe këtu në Jalë.
(BalkanWeb)
