PARIS- Tregu i Inteligjencës Artificiale në sektorin e shëndetësisë është në një rritje spektakolare, i shtyrë gjithashtu nga gjigantët e “Silicon Valley” por edhe nga kompanitë startups.
“Në vitin 2021 mund të arrijë vlerën e 6,6 miliardë dollarëve, kundrejt 634 milionë që ishte në vitin 2014”, vlerësoi kabineti “Frost & Sullivan”, që thekson se Inteligjenca Artificiale (AI) duke ndihmuar në detektimin dhe diagnostikimin e sëmundjeve në mënyrë të parakohshme do të mundësonte reduktimin e shpenzimeve shëndetësore.
Kjo është arritur kryesisht falë smartfonëve dhe objekteve të lidhura që po shfaqen gjithnjë e më shumë performantë në treg.
Kompania e sapokrijuar “Cardiogram” garanton se aplikacioni i saj mund të detektojë rahjet jo normale të zemrës të personit që mban një orë inteligjente, sipas një studimi të zhvilluar me universitetin e Kalifornisë.
“Falë sensorëve të orës, programi është në gjendje të dallojë një ritëm kardiak që mund të sjellë një krizë kardiake, njofton “Cardiogram” në faqen e saj të internetit, duke shtuar se kjo lloj aritmie nuk arrin të dallohet gjithnjë nga viktima.
Një tjetër shembull për përdorimin e inteligjencës artificiale në shëndetësi vjen nga shkencëtarët e Harvardit dhe Universitetit të Vermontit që kanë krijuar një pajisje që mundëson identifikimin e rasteve të depresionit dhe analizon foto të publikuara në rrjetin social “Instagram”.
“Fotot e njerëzve depresivë fokusohen kryesisht në ngjyrat blu, gri apo të errëtat”, shkruajnë autorët e këtij studimi, që ka analizuar të dhënat e më shumë se 43 000 fotove.
“Rezultatet ishin më të mira se sa gjysma e diagnostikimeve të zhvilluara nga mjekët e përgjithshëm”, garantojnë ata.
“Teknologjia ka pasur gjithnjë vendin e saj në mjekësi, por arritëm një kthesë kur Apple publikoi programin e tij ‘Research Kit’ në vitin 2015, që mundëson mbledhjen e të dhënave të përdoruesve të iPhone (distanca e kryer, ritmi kardiak etj.) për qëllime shkencore”, shpjegon analistja Kate McCarthy e kabinetit “Forrester”.
Sipas asaj, përparimet në fushën e Inteligjencës Artificiale kanë hapur mundësi të reja për një mjekësi të personalizuar dhe duke i mundësuar shkencës të përparojë më shpjetë.
(m.k/BalkanWeb)
