Në skemën e shpërblimeve me rastin e festave të fundvitit do të përfshihen të gjithë pensionistët, personat me status të veçantë invaliditeti dhe familjet që trajtohen me ndihmë ekonomike, ndërsa jashtë skemës do të mbeten punonjësit e administratës.

Burime nga qeveria thanë për gazetën “Panorama” se vendimi do të bëhet publik pas disa ditësh dhe pritet që për pensionistët masa e shpërblimit të variojë nga 2500 lekë deri në 3000 lekë. Në skemën e shpërblimeve nuk do të përfshihen punonjësit e administratës.

Të njëjtat burime shpjeguan se buxhetorëve shpërblimi do t’u jepet nëpërmjet rritjes së pagës, që do të nisë nga 1 marsi i 2017-ë­s. Ndërsa rreth 650 mijë pensionistë në të gjithë vendin pritet të përfitojnë shpërblim për festat e fundvitit në masën 2500­3000 lekë.

PËRFITUESIT
Pensionistët në të gjithën vendin do të përfitojë 2500 lekë deri në 3000 lekë shpërblim për festat. Konkretisht, sipas skemës, do të përfitojnë shpërblim prej 2500­3000 lekësh rreth 372.932 pensionistë, që marrin pension pleqërie, pension invaliditeti dhe pension familjar, si dhe 145.580 pensionistë që marrin pension fshati.

Përfitues të shpërblimit do të jenë edhe 81 mije kryefamiljarë që përfitojnë nga skema e energjisë elektrike, si dhe 68 mijë nga kategori të veçanta në statusin e personave me aftësi të kufizuara. Përfitues të skemës së shpërblimeve për fundvit do të jenë edhe 3,595 persona që marrin trajtim të veçantë për punën e kryer në miniera dhe në disa ndërmarrje të industrisë ushtarake dhe 10600 persona që marrin pension të parakohshëm për vjetërsi shërbimi. Vlera e shpërblimit për këto kategori do të jetë 2,5 mijë lekë deri në 3 mijë lekë.

FONDI
Fatura financiare e shpërblimeve të pensionistëve do të llogaritet në përfundim të shlyerjes së detyrimeve të prapambetura. Edhe vjet, qeveria shpërndau shpërblime për pensionistët dhe shtresat në nevojë. Vjet shpërblimi për pensionistët dhe administratën qeverisë i kushtoi 15 milionë dollarë. Fondi i miratuar në buxhet ishte 1,3 miliardë lekë.

Vendimi për shpërblimet u mor më 29 dhjetor nga Qeveria. Pensionistët në të gjithën vendin përfituan 2 mijë lekë shpërblim për festat. Për administratën, qeveria zgjodhi të shpërblente mjekët, infermierët dhe mësuesit, si kategori me merita të veçanta. Shpërblimi për mjekët dhe mësuesit ishte 40 mijë lekë, ndërsa për infermierët 30 mijë lekë. Për nxënësit ekselencë, qeveria shpërndau 40 mijë lekë shpërblim, ndërsa për studentët 50 mijë lekë.

(m.k/BalkanWeb)