ITALI – Pak ditë më parë në provincën e Milanos janë shpërndarë disa fletëpalosje raciste kundër emigrantëve, përfshi edhe shqiptarët, pranë bashkisë së qytetit.

E përditshmja italiane “Il Giorno” ka publikuar foto të fletëpalosjes ku shihet një gjuhë e ashpër ndaj emigrantëve edhe me kombësi shqiptare.

“Kalendari i gjuetisë së hapur gjatë gjithë vitit për shtazën migratore!, për marokenë, shqiptarë, rumunë, kosovarë, talebanë, afganë, bullgarë”. “Duke marrë parasysh lëkurën e tyre, është i lejueshëm përdorimi i armëve të tipit pushkë apo i bombave të dorës dhe të qenve”, citohet nga këto fletëpalosje.

Në sheshin e Foglia-s u shpërndanë mbi 100 copë, ndërkohë që kryetari i Bashkisë së Rozzanos ka justifikuar gjithçka ka ndodhur duke e quajtur “si një gabim të pavullnetshëm”.

 (BalkanWeb)