Grupi i Shtetit Islamik publikoi një video për të cilën thotë se tregon ekzekutimin me prerje koke të një oficeri rus të zbulimit në Siri. Videoja publikohet në kanalet e mediave sociale të ISIS-it.

ISIS-i thotë se personi që ekzekutohet në mënyrë brutale në video është kapiteni 36-vjeçar rus Jevgeny Petrenko, të cilin grupi e akuzon se ka infiltruar në organizatat islamike të Kaukazit, shkruan “voa”.

Ministria ruse e Mbrojtjes, sipas njoftimeve, ka mohuar se njëri nga oficerët e saj të zbulimit është kapur dhe ekzekutuar nga xhihadistët e ISIS-it.

Njeriu që e identifikon veten në video si Petrenko, pohon se është dërguar nga qeveria ruse për të depërtuar në nivelet më të larta të udhëheqjes së ISIS-it dhe akuzon Shërbimin Federal rus të Sigurisë për braktisjen e tij.

Por Ministria e mbrojtjes e Rusisë ka mohuar lajmin se “një zyrtar rus është kapur dhe ekzekutuar nga grupi militant Shteti Islamik në Siri”, kanë njoftuar agjencitë ruse të lajmeve, transmeton Reuters.

(BalkanWeb)