Mbledhja e sotme e Komisionit të Sigurisë Kombëtare për rishqyrtimin e ligjit “Për masat shtesë të sigurisë publike” nuk ka kaluar e qetë. Si brenda por edhe jashtë saj janë vërejtur momente nervozizmi të shoqëruara me tone të larta zëri.
Mësohet se deputeti i PS-së, Pjerin Ndreu ka kritikuar kryetarin e komisionit, Spartak Brahon për shkelje të procedurave duke mos i njohur anëtarët e komisionit me ndryshimin e 8 neneve të ligjit.
Më pas pati debate mes tyre që çuan në ndërprerjen e mbledhjes për 15 minuta. Nervozizmi i Ndreut ka vijuar edhe në korridoret e Kryesisë. Ndërsa Braho i kërkon një konsultë duke e kapur nga krahu, Ndreu duket se refuzon duke iu thënë: “Mos më kap me dorë” dhe “Kam punë nuk merrem me ju”.
Në rinisje të mbledhjes se komisionit mësohet të jenë ulur tonet dhe u miratuan ndryshimet e ligjit pa praninë e opozitës.
(ma.ar/BalkanWeb)