TIRANË- Kryeministri Edi Rama ka reaguar pas situatës së krijuar në vend nga zjarret e shumta duke pranuar që gjendja është e vështirë dhe do të jetë e tillë edhe në ditët në vijim.

Rama pranon se kapacitet e shtetit shqiptar për të përballuar emergjenca të tilla mbeten të ulëta duke premtuar se vitet e ardhshme do ketë përpjekje serioze për rritjen e tyre.

Kreu i qeverisë vlerëson punën e emergjencave civile, FA-ve, zjarrfikësve dhe kontribuesve të tjerë për shuarjen e flakëve.

STATUSI I KRYEMINISTRIT
SHTETI NË KRYE TË DETYRËS
Vijojnë aksionet për vënien nën kontroll dhe shuarjen e vatrave të zjarreve në këto ditë temperaturash ekstreme, të cilat kanë ndikuar rëndshëm në një situatë të paprecedentë zjarresh në mbarë mesdheun. Për përballmin e situatës janë angazhuar deri më sot 8261 vajza e djem nga Emergjencat Civile, Forcat Zjarrfikëse, Forcat e Armatosura, stafet e bashkive si edhe vullnetarë, të mbështetur me 973 mjete tokësore dhe 5 mjete ajrore (2 helikopterë dhe 3 avionë).

Situata mbetet e vështirë edhe për ditët në vijim që vala e të nxehtit të jashtëzakonshëm do të jetë prezente në territorin tonë.

S’ka dyshim se kapacitetet tona mbeten të ulëta përballë këtij kërcënimi kaq serioz dhe në katër vitet e ardhshme do të përpiqemi seriozisht për rritjen e këtyre kapaciteteve.

Sidoqoftë, faktet flasin vetë qoftë për punën kolosale që është bërë në kushte tejet sfiduese, qoftë për kujet e krismat digjitale të atyre që duhet të japin llogari e jo të kërkojnë llogari.

Nga 280 vatrat e zjarrit në të cilat ka qenë e nevojshme ndërhyrja e strukturave shtetërore, sot janë aktive vetëm 8 prej tyre dhe ky numër pritet të ulet në orët në vijim falë gatishmërisë maksimale, koordinimit të plotë dhe bashkëpunimit të lartë mes institucioneve vendore e qendrore.

(m.k/BalkanWeb)