Faza e dytë për Bylisin ka qenë e suksesshme. Edhe në ndeshjen e javës së fundit në Korçë, me vendasit që janë edhe një nga rivalët kryesorë deri më tani në betejën e mbijetesës, ballshiotët morën një pikë ashtu sikurse gjatë pjesës së dytë edhe mund ta fitonin sfidën.

Bylisi është larguar nga vendi i fundit që e mbajti për disa javë, falë edhe rezultateve pozitive në takimet e fundit. Po ta analizosh ecurinë e skuadrës mallakastriote, ka qenë një nga ekipet më të mira të elitës, pasi ka arritur që në 9-të javë të marrë 12-pikë. Dede e ka drejtuar Bylisin në 12- sfida dhe ka marrë 12-pikë, kurse paraardhësi i tij, Emanuel Egbo grumbulloi 5-pikë në gjashtë takime të Superiores.

Trajneri Nevil Dede ka arritur që t’i japë tjetër imazh Bylisit, që po bën lojë duke marrë edhe rezultate, madje në disa sfida ballshiotët mund të kishin marrë më shumë pikë, ashtu sikurse në 2-3 takime janë privuar edhe nga gjykimet. E megjithatë, tashmë që gara është në kulmin e vet, Bylisi është rritur si skuadër edhe në saj të kontingjentit, ku ka elementë cilësorë dhe me kualitet.

Në sfidën me Skënderbeun në Korçë u rikthye pas një periudhë afro një mujore mungesë edhe sulmuesi Berko që ka pasur probleme shëndetësore dhe shënoi golin që i dha pikë Bylisit. Sulmuesi ashtu si dhe Gjata shënoi golin e dytë me fanellën e Bylisit, çka tregon se ofensiva ballshiote tashmë është në formën e vetë optimale. Pa harruar edhe Ruçin e Përgjonin apo dhe Kamaranë pas tyre.

PËRGATITJET – Bylisi ka dalë dje në fushë dhe ka nisur që të mendojë për takimin e fundit zyrtar të 2024-ës, sfidën e kampionatit që do të zhvillojë në Durrës me skuadrën vendase. Në takimet e luajtura deri më tani, ballshiotët u mundën në ndeshjen hapëse 2-1 në Durrës, kurse në Ballsh triumfuan 4-0.

“E treta e vërteta”, i gjen të dyja skuadrat ndryshe, më të karikuara dhe më në formë, pasi vijnë nga dy fitore… Për më tepër që ballshiotët janë treguar solidë edhe jashtë fushe këtë sezon, duke marrë pikë të rëndësishme.