Të paktën 78 trupa janë nxjerrë nga një minierë ilegale ari në Afrikën e Jugut, ku policia ndërpreu furnizimin me ushqim dhe ujë për muaj të tërë, në atë që sindikatat e quajtën një goditje “të tmerrshme” ndaj njerëzve të dëshpëruar që përpiqeshin të siguronin jetesën.

Qindra njerëz të tjerë dyshohet se janë bllokuar 2 km (1.5 milje) nën sipërfaqen e minierës në Stilfontein, në jugperëndim të Johanesburgut, me shpëtuesit që përpiqen t’i nxjerrin të gjallë ose të vdekur punëtorët, në një operacion shpëtimi të urdhëruar nga gjykata që filloi të hënën.

Gjithsej 216 të mbijetuar, disa prej tyre të dobësuar dhe të çorientuar, janë nxjerrë në sipërfaqe dhe janë arrestuar menjëherë për punë të paligjshëm në miniera dhe emigracion të paligjshëm.

Federata e Sindikatave të Afrikës së Jugut akuzoi shtetin të martën se i lejoi burrat “të vdisnin nga uria në thellësi të tokës”.

“Këta minatorë, shumë prej tyre punëtorë pa dokumente dhe punëtorë të dëshpëruar nga Mozambiku dhe vende të tjera të Afrikës Jugore, u lanë të vdisnin në një nga shfaqjet më të tmerrshme të neglizhencës së qëllimshme shtetërore në historinë e fundit”, thuhet në një deklaratë.

Mametlue Sebei, një drejtues sindikatash që është përpjekur të ndihmojë minatorët, tha se policia kishte filluar të përpiqet t’i detyrojë minatorët të dalin në sipërfaqe në gusht duke hequr një sistem rrotullimi që përdoret për t’u shpërndarë ushqim dhe ujë./First Post/