Këta janë dy të arrestuarit nga policia për vrasjen e vëllezërve Bilali në Shkodër. Arsen Stojku, 29 vjeç, lindur dhe banues në fshatin Mjedë dhe Myslym Rama, 23 vjeç, po nga fshati Mjedë, akuzohen për të njëjtat vepra penale: “Vrasja me paramendim kryer në bashkëpunim” dhe “Prodhimi dhe mbajtja pa leje e armëve luftarake dhe municionit”.
Ndonëse nuk është i përcaktuar qartë roli i tyre në krimin e rëndë të 30 marsit në Shkodër, policia tha se vrasësi i dy vëllezërve është Ibrahim Lici, i cili është shpallu në kërkim bashkë me një tjetër person me incialet D.B. që dyshohet se e ka ndihmuar.
Dy vëllezërit Astrit dhe Brahim Bilali u ekzekutuan në pragun e portës së tyre. Astriti është babai i Asmer Bilalit, boksierit të arrestuar si pjesë e grupi “Bajri”. Ngjarja dyshohet se lidhet me hakmarrjen dhe luftën mes bandave në Shkodër.
Ibrahim Bilali, 61-vjeçar, ishte drejtues i shoqatës “2 Prilli 1992”, ndërsa vëllai i tij, Astriti 59-vjeçar, ishte kampion i garave të hipizmit.
(BalkanWeb)
