Franca, Gjermania dhe Italia anuluan një embargo armësh për t’i shitur armë Vladimir Putinit që po përdoren për të masakruar ukrainasit. Në një ditë turpi për BE-në, doli që dhjetë shtete anëtare i shitën Rusisë qindra milionë paund pajisje ushtarake midis 2015 dhe 2020. Parisi dërgoi bomba, raketa dhe eksplozivë, si dhe kamera termike për 1000 tanke dhe detektorë infra të kuqe për avionët. Berlini shiti atë që e quajti “pajisje me përdorim të dyfishtë” duke përfshirë pushkë, automjete “për mbrojtje speciale” dhe anije akullthyese dhe Roma siguroi makina të blinduara, shkruan “The Sun”.
Shtetet e BE-së, përfshirë Britaninë, atëherë anëtare, goditën Rusinë me një embargo armësh në vitin 2014 për aneksimin e Krimesë. Por një boshllëk i lejoi vendet dhe firmat të përmbushin kontratat që kishin nënshkruar më parë me Rusinë. Dhe një hetim nga “Investigate Europe” tregon se 27 shtetet e BE kanë lëshuar më shumë se 1000 licenca pas ndalimit. Franca vazhdoi të shiste 130 milionë paundë pajisje ushtarake në Kremlin, Gjermania shiti 100 milionë paundë dhe Italia bëri 19 milionë paundë.
Në vitin 2015, Roma autorizoi shitjen e automjeteve ushtarake të të gjithë terrenit Lynce në Moskë – të cilat janë parë në Ukrainë që nga fillimi i luftës nga kanali televiziv italian La7. Pavarësisht se BE vendosi një embargo për shitjen e armëve, faqja online investigative publikoi raporton se midis 2015 dhe 2020, Franca lëshoi 76 licenca eksporti në Rusi për pajisje ushtarake. Dhe sipas një raporti të “Investigate Europe”, dhjetë vende anëtare të BE-së vazhduan të dërgonin armë në Rusi pas embargos – me Austrinë, Bullgarinë, Republikën Çeke, Kroacinë, Finlandën, Sllovakinë dhe Spanjën në listë.
Shifrat nga Grupi i Punës i Këshillit të BE-së për Eksportet e Armëve Konvencionale tregojnë se dhjetë shtetet e BE-së kanë eksportuar pajisje ushtarake me vlerë gjithsej 291 milion £ në Rusi midis 2015 dhe 2020. Nga dhjetë vendet, Franca thuhet se përbënte 44 për qind të shitjeve, me avionë, sisteme navigimi, silurët dhe raketat midis pajisjeve të dërguara. Në vitin 2015, presidenti francez François Hollande iu bë presion për të hequr dorë nga planet për të shitur dy anije sulmuese amfibe të klasit Mistral në Rusi – por qeveritë e njëpasnjëshme franceze vazhduan të përfitonin nga zbrazëtia ligjore e krijuar.
Britania i shiti gjithashtu armë Rusisë pas vendosjes së embargos, por me vlerë vetëm 1.7 milionë paundë. Dhe pas shmangies së embargos ruse të armëve, Gjermania u kritikua nga kryebashkiaku i Kievit pasi ofroi të dërgonte 5000 helmeta për të mbështetur forcat ukrainase kundër trupave të Putinit. Ish-boksieri i kthyer në politikan Vitali Klitschko u tall me ofertën, duke pyetur nëse Gjermania do të donte të dërgonte jastëkë në vend të kësaj, pasi Berlini refuzoi të dërgonte armë në Ukrainë. Por vetëm disa ditë pas pushtimit, Gjermania iu nënshtrua presionit dhe ndryshoi politikën e saj historike për të mos dërguar armë në zonat e konfliktit – duke ofruar dorëzimin e 1000 armëve antitank dhe 500 sistemeve të mbrojtjes kundërajrore Stinger në Ukrainë.
Ndërkohë, ndërsa pushtimi i Putinit i Ukrainës ngeci, me SHBA-në që vlerëson se rreth 30,000 ushtarë rusë janë vrarë ose kapur që nga fillimi i konfliktit, ukrainasit sfidues kanë marrë pajisje ruse për t’i përdorur kundër tyre ndërsa lufta vazhdon në javën e saj të katërt. Volodymyr Zelensky u është lutur liderëve evropianë të dërgojnë më shumë armë për të ndihmuar ukrainasit të mbrojnë pa u lodhur vendin e tyre ndërsa forcat ruse vazhdojnë të marrin qytetet e mëdha. Udhëheqësi heroik u bëri thirrje udhëheqësve europianë të martën që të “ndihmojnë veten duke na ndihmuar” duke dërguar më shumë pajisje.
“Ne të gjithë jemi objektivi i Rusisë dhe çdo gjë do të shkojë kundër Evropës nëse Ukraina nuk do të qëndrojë, kështu që unë do të doja t’ju kërkoja të ndihmoni veten duke na ndihmuar ne”, tha Zelensky. “Ju i dini armët që na duhen. Ju e dini se çfarë lloj masash mbrojtëse na duhen. Ju e dini që nevoja jonë janë avionë luftarakë dhe pa mbështetjen tuaj do të ishte shumë e vështirë. Ne duam që ju të na ndihmoni dhe do të shpresoja se do të jeni në gjendje ta rrisni atë mbështetje dhe do të shihni se si kjo do të mbrojë sigurinë tuaj, dhe se si kjo do të sjellë një paqe të qëndrueshme jo vetëm për ne, por për vendet tuaja”.
Përktheu Balkanweb
