Presidenti ukrainas Volodymyr Zelensky tha të enjten se “mijëra” civilë mbeten të bllokuar brenda Mariupolit, pasi ai e krahasoi rrethimin rus të qytetit port juglindor me një “operacion terrorist”.
Komandantët ukrainas në terren kanë thënë se forcat ruse nuk i kanë respektuar marrëveshjet për të hapur korridoret e evakuimit apo për të zbatuar armëpushimet dhe kanë vazhduar të bombardojnë qytetin.
Mariupol është shkatërruar pothuajse plotësisht nga bombardimet ruse me javë të tëra. Dhjetëra mijëra civilë ende presin evakuimin, sipas zyrtarëve ukrainas.
Pas përpjekjeve të shumta të dështuara për të krijuar korridore të sigurta jashtë Mariupolit, katër autobusë evakuimi arritën të largoheshin nga qyteti të mërkurën.
Në një intervistë për kanalin televiziv francez BFMTV, Zelensky tha:
“Për sa i përket ushtrisë sonë, forcat e Federatës Ruse nuk na lejojnë të kalojmë nëpër këto 120 kilometra të pushtuara që të arrijmë sot në zhbllokimin ushtarak të Mariupolit.
Është e vërtetë. Nuk mund ta bëjmë sot. Ne negociojmë dhe hapim korridoret humanitare dhe disa njerëz po largohen. Por mijëra që ju thashë janë të bllokuara atje dhe Rusia deri më tani nuk po i lejon këta njerëz të dalin nga robëria”.
Presidenti rus Vladimir Putin shpalli të enjten përpjekjet e forcave ruse për të kapur qytetin e rrethuar ukrainas të Mariupolit një “sukses”, por urdhëroi forcat ruse të ndalojnë përpjekjet për të sulmuar fabrikën e rrethuar të çelikut të qytetit Azovstal, e cila ende mbahet nga forcat ukrainase.
Zelensky shtoi:
“Banorët vendas, fëmijët, të moshuarit dhe ushtarakët janë bllokuar në qytetin e Mariupol. Nuk është më shumë si një luftë, por një operacion terrorist i Rusisë kundër Mariupolit dhe njerëzve të këtij qyteti”.
