Ndahet nga jeta Leonardo Del Vecchio. Themeluesi i Luxottica dhe presidenti i EssilorLuxottica ishte 87 vjeç dhe një nga njerëzit më të pasur në Itali.
Përveç gjigantit të syzeve, ai kishte aksione të rëndësishme në Mediobanca dhe Generali.

Ai ishte njeriu klasik i vetë-bërë, i lindur në Milano në vitin 1935 nga prindër të emigruar nga Pulia, ai ishte i fundit nga katër fëmijët e familjes. Nëna e tij e ve, pak pas lindjes së Leonardos, nuk kishte mundur të kujdesej për të dhe preferoi t’ia besonte shkollës Martinitt, një institut për jetimë. Më pas, në moshën 15-vjeçare, ai mori punën e tij të parë, në një fabrikë kupash. Janë pronarët e kësaj kompanie, Johnson, ata që e kanë shtyrë të ndjekë kurset e mbrëmjes për dizajn dhe gravurë në Akademinë Brera.

Leonardo Del Vecchio nuk ka qëndruar kurrë në vend në jetën e tij të gjatë. Në moshën 22-vjeçare ai u transferua në Trentino dhe më pas në Veneto. Pikërisht në Agordo ai hapi një dyqan të kornizave të syzeve: Luxottica. Jemi në vitin 1961 dhe kompania ka 14 punëtorë dhe është e specializuar në pjesë të vogla për syze. Gjashtëdhjetë vjet më vonë, Luxottica është një kolos me 80,000 punonjës, 9,000 dyqane dhe një xhiro mbi 30 miliardë euro.

Jeta e tij profesionale ishte e gjatë dhe plot arritje. Edhe ajo private nuk mbeti mbrapa, ndoshta pak më shumë “me ngjyra”. I martuar tre herë, ai ka gjashtë fëmijë, Claudio, Marisa, Paola (nga martesa e tij e parë me Luciana Nervo), Leonardo Maria (nga gruaja e tij aktuale Nicoletta Zampillo me të cilën u martua në 1997 dhe, pas divorcit në 2000, u rimartua në 2010) , Luca dhe Clemente (lindur në 2001 dhe 2004, nga ish-partnerja Sabina Grossi).

Pasuria e tij

Leonardo Del Vecchio kishte kontribuar të gjitha aksionet e tij në një kasafortë familjare në Luksemburg, Delfin S.à.r.l.: Del Vecchio zotëronte 25% në emër të tij, aksione që ai kishte vendosur tashmë t’ia kalonte gruas së tij Nicoletta Zampillo deri në vdekje, 75% e mbetur u nda në mënyrë të barabartë midis gjashtë fëmijëve (12,5% secili). Leonardo Del Vecchio, megjithatë, kishte ruajtur 100% kontrollin, përmes uzufruktit, deri në vdekjen e tij.

“Ai ishte arkitekti i shpëtimit të tokës tonë”

“Më pëlqen të përsëris shpesh se vetëm pesimistët nuk bëjnë pasuri. Mendoj se Cavaliere Del Vecchio ishte demonstrimi i gjallë i kësaj thënieje. Një njeri që me vendosmërinë e tij dhe vizionin e tij të punës, nga hiçi, është renditur në sipërmarrësit më të suksesshëm në botë.
Dëshiroj ta kujtoj atë si një nga arkitektët e rimëkëmbjes së tokës tonë, në veçanti të shpengimit ekonomik të Italisë. Veneto i detyrohet shumë”. Kështu shprehet presidenti i Rajonit Veneto, Luca Zaia.

“Ai ishte një sipërmarrës që dukej shumë përtej ëndrrave të tij – nënvizoi Zaia -. Ai tashmë mund ta konsideronte veten të kënaqur dhe të suksesshëm me dyqanin që ndërtoi në Agordo në fund të viteve 1950, sepse një biznes shume i madh lindi pikërisht nga ai dyqan.

Luxottica, e cili në një kohë të shkurtër u shndërrua në një realitet shumë të madh produktiv, në krye të të cilit Del Vecchio u ngjit në financat ndërkombëtare, e nxorri Veneton në plan të parë në botë. Ka shumë njerëz nga luginat tona të Dolomitit që falë tij kanë gjetur një punë që shënon rrugën e mirëqenies për familje të tëra. Nëse Veneto është sot ai realiteti i madh produktiv dhe ekonomik që ne synojmë të ruajmë dhe rrisim, kjo është falë figurave si Del Vecchio, që besuan në punën tonë dhe në njerëzit tanë, ngushëllimet e mia familjes” shkruan Zaia.

“Me vdekjen e Leonardo del Vecchio, Milani humbet një nga figurat më emblematike të historisë së tij të re”. Kryetari i bashkisë së Milanos, Giuseppe Sala, ka kujtuar sipërmarrësin në faqet e tij sociale. “Vlera themeluese e Milanit është puna – shtoi ai – dhe Leonardo del Vecchio kaloi gjithë jetën e tij atje, deri në momentin e tij të fundit”.

(Tgcom24/BalkanWeb)