Vëllai i Elvis Presley-t, David Stanley, po kërkon falje për komentet që ai bëri në lidhje me këngëtarin e ndjerë në një dokumentar.

Për të gjithë fansat dhe bashkëpunëtorët e Elvisit që më ndjekin këtu në Facebook dhe më gjerë. Më vjen keq për komentet nënçmuese që bëra në një dokumentar për Elvisin që u filmua vitin e kaluar”, shkroi ai në Instagram të martën, duke iu referuar dokumentarit “Elvis’ Women” të Amazon Prime. “Nuk ka asnjë justifikim për komentet e mia dhe unë mund ta kuptoj plotësisht pse u zemëruat. E dua dhe do ta dua gjithmonë Elvisin dhe të jem pjesë e familjes së tij.

Ai është mëse i denjë për dashurinë që keni për të. Ai ju donte. Unë ju dua dhe gjithçka që mund të kërkoj prej jush është të më falni për veprimet e mia të papërgjegjshme.

Në “Elvis’ Women”, Stanley pretendoi se këngëtari vdiq nga vetëvrasja.

“Ai e kishte paramenduar marrjen e medikamenteve që e vranë. Dashuria, lëndimi, dhembja, ekspozimi – ai thjesht nuk mund të duronte më”, pohoi 67-vjeçari.

Stanley pohoi gjithashtu se Presley “nuk mund të vazhdonte” mes frikës se marrëdhëniet e tij të supozuara me vajza adoleshente do të zbuloheshin në një libër. Ai pretendoi se “shija e këngëtarit për vajzat e reja, 15 ose 16 vjeç” e sëmuri atë dhe e quajti një mrekulli faktin që Presley nuk “u shkatërrua”.

Stanley – së bashku me vëllezërit Ricky dhe Billy – hynë në jetën e Presley-t kur nëna e tij, Dee, la burrin e saj dhe u martua me babanë e këngëtarit, Vernon, në vitin 1960. Ata u divorcuan katër vjet më vonë.

Stanley filloi të punonte për Presley-n si asistent në vitin 1972, kur ai ishte 16 vjeç. Që atëherë, ai ka jetuar falë ikonës së ndjerë, duke shkruar libra dhe madje duke krijuar një shfaqje me një person në Las Vegas, ku premton të përhapë detaje mbi Mbretin e Rock ‘n’ Roll-it.

Presley vdiq nga një atak në zemër në moshën 42-vjeçare, më 16 gusht 1977.