Mbi dhjetë dronë rusë që synonin Kievin u rrëzuan gjatë natës nga mbrojtja ajrore ukrainase. Nga shkatërrimi i këtyre droneve mësohet se janë shkaktuar dëme materiale, por fatmirësisht nuk pati persona të lënduar. Kjo është bërë e ditur nga autoritetet lokale.
Sipas administratës ushtarake të kryeqytetit, grupet e dronëve shpërthyes Shahed të prodhuar nga Irani nga shumë drejtime depërtuan njëkohësisht në qiellin mbi Kiev. “Të gjitha objektivat, më shumë se dhjetë drone, u zbuluan dhe u shkatërruan në kohë,” tha kreu i administratës ushtarake Serguii Popko. Mbeturinat nga dronët e rrëzuar ranë në rrethet Solomyansky, Golosiivsky dhe Svyatoshynsky. “Ka dëmtime në ambiente dhe sipërfaqe rrugore, por jo dëmtime të mëdha apo zjarre”, -shtoi administrata ushtarake lokale në Telegram.
Kryetari i bashkisë së Kievit, Vitali Klitschko, konfirmoi rënien e rrënojave në disa lagje dhe dëme materiale. “Nuk ka të vdekur apo të plagosur në kryeqytet”, theksoi Klitschko. Në rrethin Golosiivsky mbeturinat ranë në një shesh lojërash.
(BalkanWeb)