Një 51-vjeçar, i cili ndezi zjarr për djegien e shkurreve, por aksidentalisht dogji një sipërfaqe me pemë frutore, është arrestuar pasditen e sotme në Elbasan.

Uniformat blu bëjnë me dije se në pranga ka rënë shtetasi Ali Bardhi.

Sakaq, Drejtoria Vendore e Policisë Elbasan apelon për qytetarët që në asnjë rast të mos ndezin zjarre, pasi ky veprim përbën krim dhe ndëshkohet penalisht.

Njoftimi i policisë:

Elbasan

Ndezi zjarr për djegien e barishteve, në tokën që e kishte në ruajtje, dhe si pasojë e përhapjes së flakëve u dogj një sipërfaqe me pemë frutore, Policia identifikon dhe vë në pranga 51-vjeçarin.

Shërbimet e Komisariatit të Policisë Elbasan, ditën e djeshme, sapo janë njoftuar për një vatër zjarri, në lagjen “5 Maji”, kanë shkuar menjëherë në adresën e dhënë dhe kanë nisur verifikimet për rastin.

Si rezultat i veprimeve të shpejta hetimore dhe procedurale, është identifikuar, kapur dhe arrestuar autori i dyshuar i zjarrvënies, shtetasi A. B., 51 vjeç, banues në Elbasan.

Shtetasi A. B. dyshohet se ka ndezur zjarr për djegien e barishteve, në pronën që e kishte në ruajtje, dhe si pasojë e përhapjes së flakëve është djegur një sipërfaqe me pemë frutore.

Drejtoria Vendore e Policisë Elbasan apelon për qytetarët që në asnjë rast të mos ndezin zjarre, pasi ky veprim përbën krim dhe ndëshkohet penalisht. Gjithashtu, i fton ata që të denoncojnë në numrin 112, çdo rast të tillë, me qëllim ndërhyrjen e menjëhershme për shuarjen e flakëve dhe për procedimin penal të shtetasve përgjegjës.