Bamirësia është sakrificë. Ajo i ngjason procesit të lindjes, e cila përcillet me një dhimbje sepse heq dorë nga diçka që të ka takuar ty duke e dhënë atë vullnetarisht dhe përfundon me një gëzim. Sa më e madhe dhimbja aq më e madhe është dhe bamirësia.
Bamirësia sjell shërim shpirtëror tek njeriu. E pikërisht sot do ju njohim me një zonjë e cila mund të quhet pa frikë “heroina e heshtur”.
Rajmonda Hoxha e ftuar në Vila24 me moderatore Anila Çela zbuloi historinë e saj të rrallë. Ajo prej 5 vitesh viziton “ Shtëpitë e të moshuarve” dhe çon gatime.
“Kam patur vjehrrën në shtëpi, më dhimbsen moshat e treta, edhe shoqet i kam mbi 65 vjeç. Prej 5 vitesh me burrin dhe fëmijët shkoj në “Shtëpinë e të Moshuarve”, gatuaj dhe ju çoj gatimet e mia dhe hamë si familje bashkë me ta. Më dhimbsen pasi janë të braktisur, dikur kanë qenë mjek, pedagog,mësues dhe sot janë atje, vetëm. Ata kanë nevojë për njerëz, kanë nevojë të bëjnë një bisedë. Çdo muaj unë i takoj, tani po afrojnë dhe festat dhe si çdo vit dhe këtë herë do ju çoj ëmbëlsirën”- tha zonja Hoxha për News24.
