Ministri i Mbrojtjes Niko Peleshi ka reaguar në lidhje me rrëzimin e turistëve në male në zonën e Thethit.
Peleshi shprehet se për shkak të terrenit të thyer, është dashur ndërhyrja me helikopterin Cougar. Sipas Peleshit, Forcat e Armatosura kanë qenë dhe mbeten në gatishmëri për raste emergjente.
Postimi i ministrit Peleshi:
Një grup turistësh të huaj janë rrëzuar në vendin e quajtur Qafa e Pejës, në Theth, në rrugën që lidh Thethin me Plavën e Gucinë. Sipas informacioneve njëri prej tyre nuk është në gjendje të mirë shëndetësore. Për shkak se transporti drejt Tiranës me rrugë tokësore ishte i pamundur është angazhuar helikopteri i Emergjencave Civile EC 135. Pas tij është dashur ndërhyrja e helikopterit Cougar për tërheqjen e të lënduarit me vinç.
Forcat e Armatosura janë dhe do të vijojnë të jenë në gatishmëri për çdo nevojë që ka komuniteti, por u bëjmë thirrje të gjithë qytetarëve që dëshirojnë të eksplorojnë bukuritë e vendit, veçanërisht turistëve që të bëjnë kujdes gjatë sezonit veror, për të shmangur situata të tilla, në zona me terren të panjohur dhe të vështirë!
(Balkanweb)
