Disa raste të evidentuara me “ Ethet e Nilit” janë regjistruar në bashkinë Fier që nga fundi i korrikut.
Sipas mjekes epidemiologe , Anila Moci ata janë paraqitur pranë Spitalit Rajonal Fier dhe pasi kanë rezultuar pozitiv janë dërguar për mjekim të specializuar në QSUT ku ndodhen në gjendje të mirë shëndetësore. Po sipas mjekes Moci, dy raste të tjera janë në pritje të përgjigjes nëse janë infektuar ose jo, duke theksuar se nuk ka raste të rënda me rrezik për jetën.
Përballë kësaj situate ka shtuar Moci është bërë dezinsektimi i vatrave “ hot spot” dhe i vijës bregdetare në bashkëpunim me pushtetin vendor duke theksuar se situata është nën kontroll.
Moci ka pohuar gjithashtu se “ Ethet e Nilit” është një sëmundje që transmetohet tek njerëzit nga pickimi i mushkonjave dhe prek sistemin nervor ndaj ka apeluar që edhe në ambientet shtëpiake të merren masat e duhura duke theksuar se nuk ka vend për panik pasi rastet janë sporadike dhe virusi aktualisht në bashkinë Fier nuk është kthyer në epidemi. Prej dy javësh IShP po vijon me testimet në terren duke i kërkuar pushtetit vendor të bëjë dezinsektimin e zonave ku rriten mushkonjat.
(Balkanweb)
