Me një projekt ambicioz të mbështetur nga Qeveria shqiptare dhe me synime të qarta për të marrë më të mirën nga kampionati më i fortë i planetit, Akademia e Futbollit Dyrrah City zhvilloi të tjera seleksionime për më të mirët në vendin tonë.

Në plot 3 ditë seanca impenjuese, por me një sens të qartë për të zgjuar krijueshmerinë dhe teknikën në fushë, trajnerët e njohur kaluan “në sitë” shumë të rinj premtues nga mosha 7 deri në ekipet e të rinjve. Shumë prej tyre kishin mundësinë të përfitonin regjistrim pa pagesë ose me ulje në DCFA, dhe në Shkollën e futbollit. Por jo vetëm…

Akademia e Futbollit të Dyrrah City do të fillojë aktivitetin në datën 2 shtator dhe pjesë e saj janë bërë tashmë dhe trajnerët nga Manchester City për zhvillimin e shkollës së futbollit në Dyrrah City Football Academy. Teknikët e huaj të “Citizens” do të zhvendosen dhe do të banojnë në qytetin e Durrësit.

“Përshëndetje, unë jam Ben Graham, kryetrajneri i Shkollës së Futbollit këtu në Akademinë e Futbollit Dyrrah City. Jam i entuziazmuar për sezonin që kemi përpara, ku do të ofrojmë shumë seanca argëtuese dhe emocionuese për të gjithë fëmijët”.

Akademia është në fazën e përfundimit të plotesimit të stafit të saj për pozicionet si trajnerë futbolli, ndihmës trajner, përgatitës atletik, përgatitës portierësh, mjek sportiv dhe fizioterapist që do duan te behen pjesë e DCFA.

Përkohësisht akademia do ta zhvillojë aktivitetin e saj në Olimpic Park në Durrës derisa të bëhet gati kampusi sportiv i vetë akademisë.