Brenda datës 18 shtator, Këshilli i Mandateve dhe Rregullores do të mblidhet dhe diskutojë me detaje lidhur me kërkesën e paraqitur nga Partia Demokratike për ndërprerjen e mandatit të deputetit socialist, Vullnet Sinaj.
Gjatë mbledhjes së sotme, pati debate mes deputetit Sinaj dhe kreut të Grupit Parlamentar të PD-së, Gazment Bardhi, i cili paraqiti kërkesën duke pretenduar se ligjvënësi socialist ka shkelur Kushtetutën duke përfituar fonde publike.
Ndërkohë, Sinaj u shpreh se kurrë nuk ka përfituar fonde, madje e konsideroi veten një donator, që ka dhuruar jo vetëm gjatë kohës së tërmetit plot 100 mijë dollarë përmes bizneseve të tij, por edhe pagën si deputet e ka dhuruar për njerëzit në nevojë.
Debati në jo pak raste ka kaluar me tensione, aq sa deputeti Sinaj akuzoi Bardhin se ka shantazhuar deputetët e partisë së tij, që nuk i kanë dhënë firmën për të paraqitur kërkesën lidhur me mandatin e ligjvënësit socialistë.
Por Bardhi në reagimin e tij tha se “nëse keni prova dhe fakte apo pretendime se unë kam shantazhuar dikë, atëherë mund t’i drejtoheni organeve të drejtësisë”.
(BalkanWeb)
