Mos votimi në Kuvend për dërgimin në Gjykatën Kushtetuese të mandatit të Olta Xhaçës, ka “përplasur palët në Konferencën e Kryetarëve.

Kreu i Grupit Parlamentar të Partisë Socialiste, Niko Peleshi, u shpreh se mazhoranca e ka zbatuar vendimin e Gjykatës Kushtetuese për sa kohë e çoi çështjen në seancë, ku edhe u votua ditën e enjte.

Ai u shpreh se kërkesa me të cilën i është drejtuar kryetarjaE Kuvendit, Elisa Spiropali, Komisionit të Venecias për opinion, do t’i shërbejë edhe opozitës, pasi sqaron prevalimin me dy të drejtave: diskrecionit të deputetëve për të shprehur vullnetin e lirë në seancë dhe detyrimit për zbatimin e vendimit të Gjykatës Kushtetuese.

“Natyrisht që kemi zbatuar vendimin e Gjykatës Kushtetuese duke e çuar mandatin në seancë. Kemi përmbushur të gjithë detyrimin; nuk bëhet fjalë vetëm për mandatin e një deputeti, por është i nevojshëm një qartësim për të gjitha rastet që mund të ndodhin në të ardhmen.

Ne besojmë se një opinion nga Komisioni i Venecias do të na vlejë të gjithëve, sidomos në një situatë konflikti mes dy të drejtave: diskrecionit të deputetëve për të shprehur vullnetin e lirë në seancë dhe detyrimit për zbatimin e vendimit të Gjykatës Kushtetuese.

Kjo qartësi do të na vlejë neve, dhe gjithashtu do t’ju vlejë edhe juve”, tha ai.

Ndërkohë, më parë pati tensione mes Spiropalit dhe kreut të grupit parlamentar të PD, Gazment Bardhi.