Rezultoi pa bujë rikthimi i Antonio Contes në Torino, si sfidues si ish ekipit të tij Juventusit. Bardhezinjtë marrin barazimin e tretë rradhazi pa gola në këtë kampionat. Një ndeshje që sikundër pritej do të ishte shumë e studiuar nga të dy teknikët dhe në fakt kështu rezultoi.

Si tekniku Motta po ashtu edhe Conte dukej se ishin kujdesur që më shumë të siguronin të mos dilnin pa pikë nga kjo ndeshje se sa të guxonin për të marrë maksimumin e pikëve.

Juventus dominoi sa i takon kontrollit të topit në këtë 90 minutësh, por “Zonja e Vjetër” ishte shumë pak agresive në portën kundërshtare. Nga një goditje në portë për secilën skuadër është treguesi më i qartë i zhvillimit të kësaj sfide. Për Juventusin ky është barazimi i tretë rradhazi 0-0, pas atyre ndaj Romës dhe Empolit. Skuadra e Mottës ngjitet në kuotën e 9 pikëve, ndërsa Napoli me këtë barazim në 10 pikë.

Të dy teknikët e komentuan kështu takimin e së shtunë, në Juventus Stadium:

“Jemi në rrugën e duhur, skuadra u përpoq, por për të fituar ndeshje të tilla duhet të bëjmë më shumë. Dusan më pëlqeu, arriti ta ndihmojë skuadrën gjatë pjesës së parë. Nuk jam i kënaqur nga rezultati”, u shpreh tekniku i bardhezinjve Motta.