Gazetari Almer Toska në rubrikën Opinion në News24 tha se bandat kriminale janë të interesuara që të emërojnë Drejtorin e ri të Policisë së Shtetit.

“Është vendosur se kush do të jetë drejtori i Policisë së Shtetit, atë e ka zgjedhur Belinda Balluku, e cila pasi mori 3 ministri, do të vendosë edhe Kryepolicin”, tha Toska.

Sipas tij, drejtori i Përgjithshëm i Policisë së Shtetit përflitet se do të jetë Skënder Hitaj, i cili sot është drejtor i Policisë së Durrësit. Toska shton se ai është njeriu i zv/kryeministres Belinda Ballukut.

Gjithsesi gazetari tha se në momentin e fundit, kryeministri Edi Rama mund të vendosë edhe një emër tjetër.

“Belinda Ballukut i është besuar fati i zgjedhjeve, është njeriu kyç që do të vendosë fatin e zgjedhjeve. Por pa pasur Drejtorin e Përgjithshëm e Policisë nuk mund të përcaktojë fatin e zgjedhjeve”, tha Toska.

Në vijim ai u shpreh se opozita duhet të tregojë se është ndryshe, që nuk do të trembet, nuk do të intimidohet nga kjo qeveri.

“Shqiptarëve iu duhet thënë se ne jetojmë në një shtet despotik. Edi Rama është kthyer në një lloj faraoni, është aq i shfrenuar në fantazinë e tij sa do të krijojë edhe shtetin bektashi. Opozitës po i mbahet në arrest lideri i saj, pse po bëhet kjo? Opozita duhet të aplikojë modelin e njerëzve të aksionit, keni Ervin Salianjin, të cilin duan ta dënojnë për shpifje. Pse duan ta bëjnë këtë?”, tha Toska.

(BalkanWeb)