Një raport paraprak mbi atentatin e 13 korrikut ndaj ish-presidentit Trump nga Komiteti për Sigurinë e Brendshme dhe Çështjet Qeveritare në Senat, zbuloi rishtazi gabime në funksionimin e Shërbimit Sekret në ngjarjen, gjatë së cilës u vra një spektator, dy të tjerët u plagosën rëndë dhe kandidati republikan për President u godit në vesh.
Ndër dështimet kryesore të evidentuara ishte ai i një agjenti të papërvojë me pajisjet e dronëve, i cili thirri një linjë telefonike të mbështetjes teknologjike pa pagesë për ndihmë pasi një kërkesë e mëhershme për asete shtesë pa pilot u refuzua, sipas një përmbledhjeje paraprake të gjetjeve të bëra publike të mërkurën.
Sipas komitetit, ai kishte vetëm një orë trajnim joformal me pajisjen.
“Dështimet e shumta të planifikimit dhe operacionit të parashikueshëm dhe të parandalueshëm nga USSS kontribuan në aftësinë e Thomas Crooks për të kryer atentatin e ish-presidentit Trump më 13 korrik,” thuhej në raportin paraprak.
Në vijim thuhet se këto përfshijnë role dhe përgjegjësi të paqarta, koordinim të pamjaftueshëm me zbatimin e ligjit shtetëror dhe vendor, mungesën e komunikimeve efektive dhe sistemet C-UAS jofunksionale, ndër shumë të tjera.
“Ne kemi shqyrtuar raportin e ndërmjetëm mbi tentativën për vrasjen e ish-presidentit Donald Trump.
Në këtë mjedis kërcënimi hiperdinamik, Shërbimi Sekret i SHBA nuk mund të dështojë. Shumë nga njohuritë e marra nga raporti i Senatit përputhen me gjetjet nga rishikimi i sigurisë së misionit tonë dhe janë thelbësore për të siguruar që ajo që ndodhi më 13 korrik të mos ndodhë kurrë më”, u përgjigj të mërkurën shefi i komunikimit i Shërbimit Sekret të SHBA, Anthony Guglielmi.
Sipas dëshmisë së agjentëve, asnjëri prej tyre nuk ishte në dijeni në momentin kur, 27 minuta para të shtënave, dhoma e sigurisë dhe ekipi kundër snajperëve të Shërbimit Sekret u informuan se një person i dyshimtë ishte parë pranë ndërtesës, ku qitësi përfundimisht zuri pozicion në çatinë e asaj ndërtese.
“Pak para se të ndodhnin të shtënat, një kundër snajper i USSS pa forcat vendase të zbatimit të ligjit duke vrapuar drejt ndërtesës AGR me armët gati, por ai nuk paralajmëroi detajet mbrojtëse të ish-presidentit Trump për ta hequr atë nga skena”, zbuloi komiteti në faqe 94- të raportit.
“Snajperisti i USSS-së i tha Komitetit se ndërsa panë oficerët me armët e tyre gati, nuk i shkoi në mendje të njoftonte Shërbimin Sekret që ta largonte Trumpin nga skena”, vlerëson raporti.
“Dështimet kryesore” të identifikuara në raportin e Komisionit të Senatit për Sigurinë Kombëtare dhe Çështjet Qeveritare
Asnjë individ nuk ishte përcaktuar qartë si përgjegjës për planifikimin dhe sigurinë
Ndërtesa AGR nuk është “e mbuluar në mënyrë efektive”
Komunikim joefektiv, mungesë koordinimi me organet ligjzbatuese shtetërore dhe vendore
Shërbimi Sekret refuzoi kërkesat për asete shtesë para kohe
Dështimet për të parandaluar që Trump të dalë në skenë, kur janë transmetuar informacione për “personin e dyshimtë”
Sulmi i 13 korrikut në një tubim në Butler, Pensilvani, ishte i pari nga dy përpjekjet për të vrarë Trump gjatë verës. Një kundër snajper u përgjigj me zjarr dhe vrau të dyshuarin Matthew Thomas Crooks, 20 vjeç.
Në përpjekjen e dytë, i dyshuari 58-vjeçar Ryan Routh u arrestua më 15 shtator pasi një agjent i Shërbimit Sekret pa dikë duke drejtuar një pushkë nga disa shkurre në skajin e Klubit Ndërkombëtar të Golfit në West Palm Beach, Florida, teksa ish-presidenti po luante golf atje.
