Teza e krijimit të “Vatikanit të Tiranës” për besimtarët myslimanë bektashi vazhdon të shkaktojë jehonë ndërkombëtare. Mediat më prestigjioze në planet kanë publikuar detaje menjëherë pas intervistës së kryeministrit Edi Rama për New York Times ku edhe lançoi projektin për “Shtetin Bektashi”. Edhe deklaratat e mëpasme të kreut të qeverisë kanë qenë në mbështetje të planit, pavarësisht nga skepticizmi që është krijuar brenda vendit.

E fundit që ka shkruar për të ashtuquajturin “Vatikani i Tiranës” është prestigjiozja britanike “The Sun”. Sipas gazetës, shteti i vogël do të ketë madhësinë e vetëm 14 fushave të futbollit dhe “synon të promovojë një version të islamit që është tolerant për veshjet dhe pijet alkoolike”, shkruan BalkanWeb.

Më tej, artikulli shton se i ashtuquajturi “Shteti Sovran i Urdhrit Bektashi”, do të bëhej më i vogli në botë nëse realizohej krahas shteteve të tjera të njohura si Vatikani, Monako, San Marino, Maldivet, Malta, Lihtenshtajni etj. Gjithashtu, në shkrimin e “The Sun” thuhet se “shteti bektashi do të ketë qeverinë, pasaportën dhe kufijtë e tij”.Vetë kryeministri Edi Rama ka deklaruar se Shteti Bektashi nuk do të ketë ushtri, polici dhe gjykata, por do të disponojë një njësi inteligjence për sigurinë.

Artikulli i plotë i The Sun

Shqipëria po përgatit një transformim të rëndësishëm për komunitetin e myslimanëve bektashi, i njohur si Urdhri Bektashi, i cili ka selinë në kryeqytetin e vendit, Tiranë. Ajo planifikon ta kthejë zonën e vogël në shtetin e vet sovran më të vogël se qyteti i Vatikanit dhe me theks te toleranca. Kjo do të thotë të lejohen pijet alkoolike, t’i lejosh të gjithë të veshin atë që duan dhe të refuzosh rregullat e stilit të jetesës në një lëvizje jashtëzakonisht progresive në krahasim me disa shtete të tjera islame.

Sipërfaqja e vogël prej 10 hektarësh do të kishte të gjitha shenjat dalluese të një vendi të veçantë: qeverinë, pasaportën dhe kufijtë e tij. Rreth gjysma e shqiptarëve identifikohen si myslimanë, me rreth 10% të qytetarëve të saj në varietetin bektashi. Bektashinjtë njihen si një version tolerant i Islamit, ku pirja e alkoolit lejohet me masë dhe burrat dhe gratë kanë më shumë barazi. Krijimi i shtetit të Bektashinjve është kërkuar nga kryeministri shqiptar Edi Rama dhe ka gjetur mbështetje nga lideri i fesë Baba Mondi.

Ky i fundit, i cili mund të kryesojë mikro-shtetin në të njëjtën mënyrë si Papa në Vatikan, e quajti këtë veprim një “iniciativë të jashtëzakonshme”. Ai shtoi: “Për ndjekësit tanë, kjo nuk ka të bëjë me pushtetin politik apo marrjen e tokës; ka të bëjë me forcimin e misionit të Urdhrit Bektashi për moderimin shpirtëror dhe mbrojtjen e praktikave tona fetare.”

Shqipëria ka qenë historikisht një fener i bashkëjetesës fetare dhe ky hap është një dëshmi e natyrës së ardhme të qeverisë shqiptare nën udhëheqjen vizionare të kryeministrit Edi Rama, i cili njohu rëndësinë e dhënies së hapësirës për të vazhduar promovimin e paqes. Për komunitetin tonë në mbarë botën, është një moment krenarie dhe rinovimi, duke forcuar identitetin dhe praninë tonë në skenën globale.”

Në një deklaratë të Urdhrit Bektashi thuhej: “Urdhri Bektashi, i cili njihet për mesazhin e tij të paqes, tolerancës dhe harmonisë fetare, do të fitojë sovranitet të ngjashëm me Vatikanin, duke na lejuar të qeverisim në mënyrë autonome nga pikëpamja fetare dhe administrative”.

Duke folur në Kombet e Bashkuara, Rama tha të dielën se kjo do të forconte reputacionin e Shqipërisë si një komb tolerant. Ai vuri në dukje se Shqipëria i shpëtoi refugjatët hebrenj nga tmerret e nazistëve në Luftën e Dytë Botërore dhe së fundmi ndihmoi afganët e pafajshëm të shpëtonin nga përbindëshat talebanë. Rama tha se historia krenare e vendit – duke përfshirë dhurimin e botës Nënë Tereza, shërbeu si frymëzim për një shtet të veçantë bektashi.

“Ajo na tha se jo të gjithë ne mund të bëjmë gjëra të mëdha, por të gjithë mund të bëjmë gjëra të vogla me dashuri të madhe. Ky është frymëzimi ynë për të mbështetur transformimin e Urdhrit Botëror Bektashian në një shtet sovran në kryeqytetin tonë, Tiranë, si një qendër e re moderimi, tolerance dhe bashkëjetese paqësore”, tha ai.

Por si funksionojnë mikro-shtetet?
The Sun shkruan se mikro-shtetet klasifikohen si shtete sovrane, që do të thotë se ato janë të vetëqeverisura, pavarësisht se pretendojnë vetëm një sasi të vogël toke ose popullsie, ose të dyja. Pavarësisht se janë të vogla, ato kanë të njëjtat dokumente administrative që karakterizojnë vendet më të mëdha në botë, si kufijtë dhe pasaportat. Por ata shpesh mbështeten në vendet e tjera për mbijetesë, duke qenë se kanë vetëm një ushtri të vogël dhe mungesë të burimeve të tyre.

10 shtetet më të vogla në botë
Por kush janë 10 shtetet më të vogla në botë. Qyteti i Vatikanit, shkruan The Sun, aktualisht mban titullin si vendi me sipërfaqen më të vogël në planet. Vatikani është 39 milionë herë më i vogël se shteti më i madh në botë, Rusia.

Mes mikro-shteteve përfshihet edhe Monako, një shtet i pasur dhe mjaft i frekuentuar për turizëm. Po ashtu në listën e mikroshteteve është edhe San Marino që shtrihet brenda territorit të Italisë.

Këtu janë 10 shtetet më të vogla në botë:

1. Qyteti i Vatikanit – 0,17 milje katrorë
2. Monako – 0,8 milje katrorë
3. Nauru – 8 milje katrorë
4. Tuvalu – 10 milje katrorë
5. San Marino – 24 milje katrorë
6. Lihtenshtajni – 62 milje katrorë
7. Ishujt Marshall – 70 milje katrorë
8. Saint Kitts dhe Nevis – 102 milje katrorë
9. Maldivet – 114 milje katrorë
10. Malta – 122 milje katrorë.

(BalkanWeb)