Deputeti demokrat, Ervin Salianji përmes përfaqësuesve ligjorë ka kërkuar në Gjykatën e Lartë pezullimin e vendimit të Gjykatës së Apelit për dënimin e tij me 1 vit burg.
Lajmi konfirmohet për BalkanWeb nga gazetari Igli Çelmeta. Në kërkesë theksohet se pezullimi i ekzekutimit të vendimit është i rëndësishëm edhe për ruajtjen e mandatit të deputetit, i zgjedhur me mbi 10 mijë vota preferenciale. Sipas përfaqësuesve ligjorë, rasti duhet të jetë objekt shqyrtimi nga Gjykata e Lartë pasi sovraniteti në Republikën e Shqipërisë i përket popullit.
“Në lidhje me cilësinë aktuale të deputetit, do i referohemi faktit që ende nuk ka një vendimmarrje të Komisionerit Shtetëror të Zgjedhjeve në zbatim të nenit 164 të K.Zgjedhor, çka do të thotë që pezullimi i ekzekutimit është i rëndësishëm përveçse për vuajtjen e dënimit me burgim, por edhe për ruajtjen e mandatit të deputetit si një mandat që i takon popullit. Duke qenë se kërkuesi Ervin Salianji është zgjedhur deputet nga populli me mbi 10 mijë vota preferenciale në zgjedhjet e vitit 2021, zgjedhje këto të zhvilluara pas vendimit të Gjykatës së Rrethit Gjyqësor Tiranë (18.12.2019), vendim ky i lënë në fuqi me vendimin e Gjykatës së Apelit të Juridiksionit të Përgjithshëm, është tregues i shkakut të veçantë që paraqet ky rast në kuptim të nenit 476 pika 1 të K.Pr.Penale. Besimi me votë që i ka dhënë populli, pavarësisht një vendimmarrje gjykate të dhënë më parë, është tregues i veçantisë që ka rasti objekt shqyrtimi, për më tepër që sovraniteti në Republikën e Shqipërisë i përket popullit”, thuhet në kërkesë.
Gjithashtu, në kërkesën e avokatëve të Salianjit thuhet se “vendimi i Gjykatës së Apelit nuk është vënë në dispozicion as i arsyetur dhe as i përmbledhur”.
Ndërsa sqarohet gjithashtu se “si fillim kemi depozituar një “Rekurs të përmbledhur” pranë kësaj gjykate, duke ruajur të drejtën për plotësimin e tij pas njoftimit të vendimti të arsyetuar të Gjykatës”. Gjykata e Apelit pritet të zbardhë të arsyetuar vendimin për Ervin Salianjin brenda 45 ditëve.
Vetë deputeti Salianji por edhe PD e partitë e tjera opozitare e konsiderojnë dënim politik vendimin e Apelit që e çoi atë në qeli me akuzën e kallëzimit të rremë ndaj Agron Xhafajt, vëllait të ish-ministrit të Brendshëm, Fatmir Xhafaj.
(BalkanWeb)
