TIRANE
Universiteti ‘Luarasi’ mirëpriti sot qindra studentë, duke shënuar nisjen zyrtare të vitit të ri akademik. Ky moment i rëndësishëm vjen me entuziazëm të madh, ndërsa studentët e rinj zgjedhin këtë institucion për të vazhduar rrugëtimin e tyre akademik, të bindur në cilësinë e mësimdhënies dhe mundësitë që ofron Universiteti ‘Luarasi’.
Rektori i Universitetit, Prof. Dr. Ethem Ruka, i cili udhëhoqi ceremoninë e hapjes, e cilësoi këtë ditë si një ogur të mirë për të ardhmen e ndritur të studentëve të rinj. Ai nënvizoi rëndësinë e këtij momenti si një hap vendimtar drejt suksesit të tyre profesional dhe personal.
Gjatë fjalimit të tij, Prof. Dr. Ethem Ruka theksoi interesin e lartë që ka shfaqur ky universitet këtë vit, ku shumica e degëve të studimit kanë plotësuar kuotat që në fazat e hershme të aplikimeve.
“Universiteti Luarasi ka pasur një interes të jashtëzakonshëm, ku shumica e degëve të studimit kanë plotësuar kuotat e tyre që në fillim të aplikimeve. Kjo tregon besimin e lartë që studentët dhe prindërit kanë për këtë universitet,” tha Ruka.
Ai shtoi gjithashtu se përkushtimi ndaj cilësisë së mësimdhënies është një parim i patjetërsueshëm për Universitetin Luarasi.
“Dija është e shenjtë dhe Universiteti Luarasi është një mjedis që kultivon dije dhe korrektësi, në përputhje të plotë me rregullat dhe ligjet,” nënvizoi ai, duke nxjerrë në pah vlerat që e bëjnë këtë institucion një zgjedhje të veçantë për studentët.
Pas ceremonisë, studentët e rinj patën mundësinë të njihen me pedagogët që do t’i udhëheqin gjatë studimeve të tyre. Ata u njohën me klasat moderne dhe infrastrukturën që do t’i mbështesë në realizimin e objektivave të tyre akademike. Universiteti Luarasi ofron një mjedis të kompletuar dhe bashkëkohor, i cili plotëson të gjitha nevojat e një institucioni arsimor të nivelit të lartë.
Ky fillim i ri akademik është vetëm fillimi i një rrugëtimi të gjatë për këta studentë të rinj, të cilët do të përfitojnë nga mundësitë e jashtëzakonshme që ofron Universiteti ‘Luarasi’. Me një përkushtim të madh ndaj dijes dhe zhvillimit të të rinjve, ky universitet mbetet një lider në ofrimin e arsimimit cilësor dhe inovativ në Shqipëri.
