Juristi Ylli Manjani ka folur në një komunikim të drejtpërdrejtë në studion e emisionit “Open” mbi padinë e tij në Gjykatën Kushtetuese, e cila lidhet me të dhëna nga platforma SKY ECC.

Manjani shprehu shqetësimin se përdorimi i këtyre të dhënave dhe të atyre nga Encrochat është një çështje e re për sistemin ligjor shqiptar, duke theksuar se “legjislacioni ynë në tërësi është i shurdhët dhe ka shumë pikëpyetje”.

Ai sqaroi se kërkesa e tij bazohet në një arsyetim kushtetues, duke kërkuar që të dhënat e marra në mënyrë të paligjshme gjatë procesit penal të mos konsiderohen si dokumente. “Këto përgjime duhet të futen në kuadër të kërkimit për mjetin e provës, siç e thotë ligji ynë procedural,” theksoi Manjani.

Sipas tij, prokurorët e kanë pranuar se janë para përgjimeve, por për të arritur një marrëveshje në këtë çështje kanë nevojitur 15 muaj. “Këtë situatë nuk e kemi shpikur ne,” përfundoi ai.