Reformat e ndërmarra nga qeveria e Nigerisë janë “thelbësore”, por kanë ngritur presion mbi popullin e saj, më shumë se gjysma e të cilëve jetojnë në varfëri, tha Banka Botërore.
Që nga ardhja në pushtet në maj 2023, Presidenti Bola Ahmed Tinubu ka prezantuar reforma që synojnë ringjalljen e ekonomisë së kombit më të populluar të Afrikës.
Masat përfshijnë liberalizimin e monedhës së dëmtuar naira dhe shkurtimin e subvencioneve të karburanteve, të cilat i lejuan shtetit të mbante çmimet e benzinës të ulëta për dekada.
“Drejtimi i ri i politikës është thelbësor, por në afat të shkurtër ai ka shtuar presionet tashmë intensive mbi familjet dhe firmat,” tha Banka Botërore në një raport.
Vendi i Afrikës Perëndimore ka parë një nga krizat e tij më të këqija ekonomike në historinë e fundit me inflacionin në nivelin më të lartë të tre dekadave — më shumë se 30 përqind — dhe çmimi i benzinës është rritur më shumë se pesëfish që kur Tinubu mori detyrën.
Varfëria është rritur duke goditur më shumë se gjysmën e popullsisë gjatë gjashtë viteve të fundit, sipas Bankës Botërore.
Që nga viti 2018, pjesa e nigerianëve që jetojnë nën kufirin kombëtar të varfërisë vlerësohet të jetë rritur ndjeshëm nga 40.1 përqind në 56.0 përqind. 129 milionë njerëz tani jetojnë në varfëri.
Çështje të shumta kanë kontribuar në rritjen e varfërisë, tha Banka Botërore, duke përmendur “recesionin e Covid-19, fatkeqësitë natyrore si përmbytjet, pasiguria në rritje, kostoja e lartë e politikës së demonetizimit në tremujorin e parë të 2023, inflacioni i lartë dhe rritja e ulët ekonomike”.
Pjesa e popullsisë urbane që jeton në varfëri është pothuajse dyfishuar, nga 18 në 31.3 për qind, sipas raportit, të botuar dy herë në vit duke vlerësuar zhvillimet dhe perspektivat ekonomike dhe sociale në Nigeri.
“Inflacioni total parashikohet të arrijë kulmin me një normë mesatare vjetore prej 31.7 për qind në vitin 2024, i nxitur kryesisht nga zhvlerësimi i monedhës naira dhe rritja e çmimeve të benzinës,” tha ai.
Banka Botërore tha se inflacioni pritej të bjerë nga 32.7 përqind në shtator në 14.3 përqind deri në vitin 2027, i ndihmuar nga reformat makroekonomike të qeverisë.
Duke qenë se dy të tretat e nigerianëve janë nën moshën 25 vjeç, qeveria duhet të krijojë vende pune, shtoi organizata.
(A.A/BalkanWeb)
