Grupi militant palestinez, Hamas, ka të ngjarë të zëvendësojë Yahya Sinwarin me një udhëheqës të ri politik me bazë jashtë Gazës, ndërsa vëllai i tij – Mohammad Sinwar – pritet të marrë një rol më të madh në drejtimin e luftës kundër Izraelit në territor, thonë ekspertët.

Në diskutimet e tij udhëheqëse, Hamasi duhet të marrë parasysh jo vetëm preferencat e mbështetësit të tij kryesor – Iranit – por edhe interesat e Katarit ku banojnë të gjithë kandidatët kryesorë për të marrë postin e shefit të Byrosë Politike, raporton Reuters.

Sinwar, organizator i sulmit të 7 tetorit 2023 që ndezi luftën shkatërruese të Gazës, u vra nga forcat izraelite në një përleshje me armë të mërkurën – hera e dytë në më pak se tre muaj që Hamasi humbi liderë të lartë. Shefi i tij i mëparshëm, Ismail Haniyeh, u vra në Iran në muajin  korrik.

Pas më shumë se një viti sulmesh të egra izraelite që kanë goditur Hamasin, janë vrarë mijëra luftëtarë të tij dhe janë eliminuar figura të larta brenda dhe jashtë Gazës.