Në një telefonatë të martën me kryeministren e Italisë, presidenti turk Rexhep Tajip Erdogan vlerësoi reagimin e Romës ndaj agresionit të Izraelit në rajon, duke theksuar përpjekjet e vendosura të Turqisë për paqen në Lindjen e Mesme.

Erdogan i tha gjithashtu Giorgia Melonit se mbështetja nga Roma do të forconte dorën e Ankarasë në përpjekjet në OKB për të ndalur shitjet e armëve në Izrael, tha Drejtoria e Komunikimit të Turqisë.

“Presidenti Erdogan nënvizoi rëndësinë e bashkësisë ndërkombëtare që të veprojë së bashku për të ndaluar agresionin izraelit dhe vuri në dukje se mbështetja e Italisë për iniciativën e Turqisë në OKB për të ndalur shitjet e armëve në Izrael do ta forconte këtë përpjekje,” tha ai në X.

Erdogan dhe Meloni diskutuan gjithashtu lidhjet dypalëshe dhe çështjet globale dhe rajonale, tha drejtoria.

“Presidenti Erdoğan deklaroi se marrëdhëniet Turqi-Itali po përparojnë çdo ditë dhe theksoi se vëllimi i tregtisë dypalëshe mund të rritet përmes hapave vendimtarë, veçanërisht në industrinë e mbrojtjes dhe në fusha të tjera.

Erdogan tha se sulmet e Izraelit në territoret palestineze, përfshirë Gazën, si dhe sulmet e tij ndaj Libanit dhe paqeruajtësve të OKB-së atje, janë të papranueshme.

“Presidenti Erdogan deklaroi se Izraeli ka injoruar të gjitha paralajmërimet dhe ka zgjeruar ciklin e dhunës në Lindjen e Mesme”, shtoi ai.

“Presidenti Erdogan falënderoi kryeministren italiane Meloni për qasjen e saj që mbështet konceptin e familjes, i cili thekson vlerat familjare përballë mbrojtësve LGBT”, thuhet në deklaratë.

(A.A/BalkanWeb)