Princi William ka zbuluar se puna e tij për të trajtuar të pastrehët ishte frymëzuar nga një vizitë në një strehë me nënën e tij Diana kur ai ishte fëmijë.

Duke folur në një dokumentar me dy pjesë që përshkruan vitin e parë të përpjekjes së tij për të trajtuar këtë çështje, trashëgimtari i fronit, 42 vjeç, tha se kishte marrë “frymëzimin dhe udhëzimin” nga Diana, Princesha e Uellsit.

“Kur isha shumë i vogël, nëna ime filloi të fliste për të pastrehët, ashtu si bëj tani me fëmijët e mi në shkollë”, shpjegoi Princi. Ai shtoi se momenti ku nëna e tij filloi t’i fliste ishte diçka që pati një rezonancë të thellë mbi të.

Princi vizitoi për herë të parë një strehë për të pastrehët në dhjetor 1993, në moshën 11-vjeçare, kur Princesha e ndjerë e Uellsit e çoi atë dhe Princin Harry në The Passage, një organizatë bamirëse që mbështet njerëzit që janë sapo të pastrehë.

“Ajo u përpoq që ne të njihnim jetën e vërtetë jashtë mureve të pallatit” tha ai, duke shtuar se qasja e saj e ka frymëzuar atë për të diskutuar çështjen me tre fëmijët e tij.

Duke rikthyer kujtimet kryesore të fëmijërisë, Princi tha: “Ajo na mori mua dhe Harry-n atje. Duhet të kem qenë rreth 11, mendoj ndoshta… Ndoshta 10. Nuk kam qenë kurrë në diçka të tillë më parë. Më kujtohet se në atë kohë mendoja, mirë nëse të gjithë nuk kanë shtëpi, të gjithë do të jenë shumë të trishtuar. Por ishte e pabesueshme se sa i lumtur ishte një mjedis i tillë”, tha ai.

Kensington Palace ka zbuluar fotografitë e Dianës të papublikuara më parë me djalin e saj të madh gjatë dy vizitave të tyre në Passage në 1993, njëra në qershor dhe tjetra para Krishtlindjeve.

Në një foto, Princi shihet i veshur me një këmishë të kuqe polo teksa luan shah dhe në një tjetër, ai dhe nëna e tij janë në kuzhinën e strehës.

Dokumentari tregon Princin e Uellsit duke ndërmarrë angazhime në shtëpi dhe duke takuar njerëz të pastrehë, si dhe duke dëgjuar histori individuale që i çuan ata në situatat e tyre.