Një sondazh i zhvilluar në SHBA tregon se qytetarët janë të shqetësuar për dhunën e mundshme pas zgjedhjeve presidenciale të 5 nëntorit dhe përpjekjet për të ndryshuar rezultatet, transmeton Anadolu.
Në sondazhin e realizuar nga Associated Press (AP) dhe Qendra për Çështjet Publike, votuesit u pyetën për shqetësimet e tyre në lidhje me dhunën e mundshme pas 5 nëntorit.
Sipas sondazhit, 4 në 10 të anketuar janë “jashtëzakonisht” të shqetësuar për dhunën e mundshme paszgjedhore dhe përpjekjet për të përmbysur rezultatet e zgjedhjeve.
Përafërsisht një e treta e pjesëmarrësve nuk mendojnë se do të ketë dhunë paszgjedhore.
Ndërsa 1 në 3 votues thonë se janë “shumë” të shqetësuar për përpjekjet e zyrtarëve zgjedhorë lokalë ose shtetërorë për të parandaluar përcaktimin e rezultateve.
Vetëm rreth një e treta e të anketuarve kanë mendimin se republikanët do të pranojnë rezultatet nëse kandidati presidencial Donald Trump humbet zgjedhjet.
Demokratët dhe republikanët kanë pikëpamje të ndryshme për këtë çështje. Gati dy të tretat e republikanëve mendojnë se Trump do të pranojë rezultatet ndërsa vetëm 1 në 10 demokratë i bashkohen këtij mendimi.
Rreth gjysma e pjesëmarrësve deklarojnë se është një “problem i madh” në zgjedhjet amerikane mundësia që një kandidat të bëhet president duke humbur votën popullore dhe duke fituar Kolegjin Zgjedhor.
