Tre viktima dhe një i plagosur rëndë është bilanci i atentatit në lagjen Dobraç të Shkodrës. Rreth orës 15:30 të kësaj të mërkure, drejt një automjeti ku udhëtonin dy të rinjtë Hamza Lici dhe Arlind Bushati u qëllua me breshëri kallashnikovi nga një makinë “Land Rover” në lëvizje. Vëllai i “të fortit” të Shkodrës Ibrahim Lici humbi jetën në vendin e ngjarjes si pasojë e të shtënave. Arlind Bushati u dërgua në spitalin e Shkodrës në gjendje të rëndë, pasi kishte marrë një plumb në kokë. Gjatë të shtënave në drejtim të dy viktimave, automjeti ku ata udhëtonin humb kontrollin dhe për pasojë përplas një motor të rastit ku udhëtonin burrë e grua, Bashkim dhe Flutra Basha. Kjo e fundit nuk i mbijeton përplasjes, ndërsa bashkëshorti i saj plagoset rëndë.
Atentati i paralajmëruar?
Arlind Bushati, djali i ish-kandidatit të PD për Bashkinë e Shkodrës, Xhemal Bushati pak javë më parë denoncoi në Policinë e Shkodrës një kërcënim që i kishte ndodhur në pedonalen e qytetit. 32-vjeçari denoncoi në Polici në datën 11 tetor 2024 se persona të paidentifikuar që qarkullonin me motor i kishin drejtuar armën 32-vjeçarit afër një lokali në pedonalen e Shkodrës, ku ka pasur edhe shumë qytetarë të tjerë në lokal.
Arma që i ishte drejtuar të riut nuk kishte arritur të hapte zjarr. Dyshimet ishin se kishim të bënim me një atentat të dështuar.
“Më datë 11.10.2024, në orën 09:30, shtetasi A. B., 32 vjeç, ka kallëzuar se mbrëmjen e djeshme, rreth orës 22:30, persona të paidentifikuar që qarkullonin me një motomjet, i kanë drejtuar një send, në dukje armë zjarri, afër një lokali në pedonalen e Shkodrës”, njoftoi Policia e Shkodrës.
Nuk dihet nëse blutë e Shkodrës kërkuan të marrin në mbrojtje 32-vjeçarin pas denoncimit të këtij të fundit. Në automjetin ku udhëtonin Hamza Lici, 23 vjeç dhe Arlind Bushati, 32 vjeç, grupi hetimor gjeti 3 armë zjarri të llojit pistoletë. Viktimat e dinin se herët a vonë të binin pre e atentatit. Burime për BalkanWeb bëjnë të ditur se Arlind Bushati ka arritur të përdorë njërën nga armët dhe ka qëlluar në drejtim të atentatorëve. Ndërsa Hamza Lici është netrualizuar që në të shtënat e para, pa i lënë mundësi të marrë armën.
(BalkanWeb)
