SARANDË
Zbardhen 3 vjedhje të kryera në qytetin e Sarandës, vihet në pranga autori i dyshuar i vjedhjeve. Policia e Sarandës ka arrestuar një 37-vjeçar, që siç duket dhe nga kamerat e sigurisë që kanë kapur momentin kur po vidhte, ishte specialist i aktivitetit kriminal.
Shërbimet e Komisariatit të Policisë Sarandë, në vijim të punës për parandalimin dhe zbardhjen e rasteve të vjedhjes, si dhe për vënien e autorëve përpara përgjegjësisë ligjore, bazuar në hetimet e kryera dhe provat e siguruara, vunë në pranga shtetasin Elvis Zoto, 37 vjeç, banues në Sarandë, për veprën penale “Vjedhja”.
Nga veprimet hetimore, dyshohet se ky shtetas, më datë 31.10.2024, në rrugën “Abedin Dino”, ka vjedhur një çantë krahu nga automjeti i shtetasit S. M., ndërsa më datë 30.10.2024, në të njëjtën rrugë, ka vjedhur 2 celularë nga automjeti i shtetasit A. Sh. Gjithashtu, dyshohet se më datë 29.10.2024, ka vjedhur disa produkte në një supermarket në lagjen nr. 4.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme.
