Gjermania i ka bërë thirrje Izraelit që të lejojë më shumë ndihma humanitare në veri të Gazës, ku mungesa e furnizimeve ka çuar në një situatë “të dëshpëruar” dhe “të padurueshme”, tha një zëdhënës i Ministrisë së Jashtme gjermane.

“Ne i bëjmë thirrje qeverisë izraelite që urgjentisht të përmbushë përgjegjësitë e saj sipas ligjit ndërkombëtar”, tha zëdhënësi në një konferencë të rregullt për shtyp në Berlin.

“Izraeli ka të drejtën e vetëmbrojtjes kundër Hamasit brenda kornizës së ligjit ndërkombëtar humanitar”, shtoi ai.

Zëdhënësi po i përgjigjej një pyetjeje në lidhje me një ultimatum të vendosur nga Uashingtoni për Izraelin që të përmirësojë situatën humanitare në Gaza këtë muaj ose të përballet me kufizime të mundshme për ndihmën ushtarake amerikane.