Sekretari i përgjithshëm i NATO-s, Mark Rutte, ka thënë se është meritë e presidentit të zgjedhur të SHBA-së, Donald Trump, që shtetet anëtare të aleancës kanë rritur shpenzimet për mbrojtje.

Trump gjatë mandatit të parë të tij si president i SHBA-së kishte insistuar që shtetet anëtare të rrisin shpenzimet për mbrojtje, ta kalojnë pragun e shpenzimit prej 2 për qind të bruto produktit vendor për mbrojtje.

“Dua të uroj sërish presidentin Trump për rizgjedhje. Ishte sukses i madh për të. Kur ishte president ai na stimulojë të kalojmë pragun e shpenzimit të 2 për qind të GDP-së për mbrojtje. Falë tij, NATO është mbi dy për qind. Duhet të bëjmë më tepër, e kemi kuptuar këtë”, tha Rutte për gazetarët para Samitit të Komitetit Politik të Evropës.

Ai ka folur edhe për rreziqet që po i kanosen botës. Rutte ka thënë se Rusia e ka furnizuar Korenë e Veriut me teknologji të reja, ndërsa kjo kërcënon tash territorin amerikan, Evropën, por edhe shtetet aleate në Indo-Paqësor, si Japoninë e Korenë e Jugut. Ai ka thënë se Koreja e Veriut, Irani, Kina dhe Rusia po punojnë së bashku.