Presidenti amerikan Joe Biden ka deklaruar në konferencën e tij për shtyp ditën e sotme se demokratët pranojnë zgjedhjen që vendi bëri me Donald Trump në garën presidenciale.
Ai u shpreh se në 20 janar, dita kur Trump do të marrë zyrtarisht detyrën, do të ketë një transferim paqësor të pushtetit në Amerikë. Biden e vuri theksin edhe te sistemi zgjedhor amerikan dujke theksuar se këto zgjedhje i dhanë fund dilemës dhe se rezultatet e dala nga ky proces ishin transparente dhe të ndershme.
“Fushatat janë gara të vizioneve konkurruese. Vendi zgjedh njërën ose tjetrën. Ne pranojmë zgjedhjen që bëri vendi. Nuk mund ta duash vendin tënd vetëm kur fiton. Nuk mund ta duash fqinjin tënd vetëm kur bie dakord me të. Diçka që shpresoj se mund të bëjmë pa marrë parasysh kë ke votuar, është ta shohim njëri-tjetrin jo si kundërshtarë, por si amerikanë të tjerë. Ulni temperaturën.
Unë gjithashtu shpresoj se ne mund t’i japim fund pyetjes rreth integritetit të sistemit zgjedhor amerikan. Është i sinqertë, është i drejtë dhe transparent. Dhe mund t’i besohet, të fitojë ose të humbasë.
Unë do të bëj detyrën time si president. Unë e përmbush betimin tim dhe do të respektoj Kushtetutën. Më 20 janar, ne do të kemi një transferim paqësor të pushtetit këtu në Amerikë.
E di që është një kohë e vështirë. Jeni të lënduar. Unë ju dëgjoj dhe ju shoh. Por mos harroni. Mos harroni gjithçka që kemi arritur. Ka qenë një presidencë historike. Jo sepse jam president, sepse çfarë kemi bërë ne, çfarë keni bërë ju”, u shpreh presidenti në detyrë, Joe Biden.
(BalkanWeb)
