Ndalimi i veshjes së mbulesës së fytyrës në vende publike në Zvicër do të hyjë në fuqi më 1 janar 2025, ka njoftuar qeveria. Masa e diskutueshme, e njohur gjerësisht si “ndalimi i burkës”, u miratua në një referendum mbarëkombëtar dy vjet më parë.

Data e hyrjes në fuqi të ndalimit u caktua nga Këshilli Federal, autoriteti më i lartë ekzekutiv në Zvicër, në një takim të mërkurën. Kushdo që mbulon fytyrën në publik në të gjithë vendin do të dënohet me një gjobë deri në 1,000 franga zvicerane (1,141 dollarë), tha qeveria në një deklaratë.

Ndalimi zbatohet për veshjet muslimane (burka dhe nikab) dhe për maskat e skive dhe maskat e përdorura nga protestuesit.

Ndalimi nuk përfshin aeroplanët, ambientet diplomatike dhe konsullore dhe vendet e kultit, tha qeveria. Mbulimi i fytyrës lejohet gjithashtu për arsye të shëndetit, sigurisë, kushteve klimatike dhe zakoneve lokale, si dhe për shfaqje artistike dhe argëtuese dhe për qëllime reklamimi, shtohet në deklaratë.

Referendumi në mars 2021 u mbajt si rezultat i një nisme popullore, ‘Po ndalimit të mbulimit të fytyrës’. Propozimi u miratua nga 51.2% e votuesve zviceranë dhe më pas u miratua nga parlamenti në shtator 2023. Propozimi u mbështet nga Partia Popullore Zvicerane e krahut të djathtë, grupi më i madh në parlament.

Qeveria zvicerane e kishte kundërshtuar masën si të tepruar, duke argumentuar se ndalimi mund të dëmtojë turizmin. Shumica e grave muslimane që mbajnë mbulesë në Zvicër janë vizitore nga shtetet e Gjirit Persik, vuri në dukje AP.

Ndalimi u dënua edhe nga shoqatat myslimane në vend.