Partia Demokratike ka reaguar sërish pasi Gjykata e Apelit ende nuk ka zbardhur vendimin që dënoi ish-deputetin Ervin Salianji me 1 vit burg për kallëzim të rremë. Numri 2 i PD, Agron Gjekmarkaj shprehet se Gjykata e Apelit ka shkelur haptazi të drejtat e Ervin Salianjit, duke mos zbardhur vendimin e arsyetuar.
Ky qëndrim i Gjykatës së Apelit, thekson Gjekmarkajt, po i vonon rrugën drejt pafajësisë Ervin Salianjit.
“Kodi i Procedurës Penale është një ligj i rëndësishëm i Republikës, dhe është në fuqi. Ky kod, përcakton se vendimi i një gjykate duhet të zbardhet brenda 30 ditësh. Vendimi i Apelit ndaj Ervin Salianjit, nuk është zbardhur edhe pse kanë kaluar pothuaj 50 ditë, nga momenti i shpalljes, duke i shkelur atij haptazi të drejtat, duke i mohuar rekursin në Gjykatën e Lartë, duke i vonuar rrugen drejt pafajësisë.
Në rastin e Salianjit, nuk është në fuqi Kodi i Procedurës Penale pra, por Kodi i Fatmir Xhafës! Po ashtu Edi Rama e di para se tē shpallet vendimi, e di çfarë thuhet, dhe e di ai se kur duhet zbardhur. I dënuari, dhe publiku nuk kanë pse ta dinë.
Mbërritëm në diten kur ligji, kodi, afati është Qeveria dhe shefi i saj. Dhe kuptohet që për kundërshtarin politik, nuk ka asnjë garanci kushtetuese, nuk ka barazi para ligjit. Ka burg, pa akuzë, ka denim me vendim të fshehte, të pazbardhur”, shprehet Gjekmarkaj.
(BalkanWeb)
