Disa kompani mediatike franceze në pronësi të miliarderit Bernard Arnault kanë ngritur një padi kundër rrjetit të mediave sociale X të Elon Musk, duke akuzuar platformën për shpërndarjen e përmbajtjes së tyre pa paguar për të.
Padia u ngrit të martën nga Les Echos dhe Le Parisien, të cilat janë pjesë e konglomeratit luksoz të Arnault, LVMH. Lëvizja mbështetet nga Le Monde, Le Figaro, Telerama, Courrier International, Huffington Post, Malesherbes Publications dhe Le Nouvel Obs.
Sipas Forbes, Arnault është aktualisht personi më i pasur në Evropë dhe i 5-ti më i pasur në botë, me një pasuri të vlerësuar familjare prej 156 miliardë dollarësh. Musk, i cili gjithashtu zotëron Tesla dhe SpaceX, mban vendin e parë në nivel global me një vlerë prej 308 miliardë dollarësh.
Mediat franceze kanë akuzuar X për shkeljen e të ashtuquajturave “të drejta fqinje” , të cilat i referohen honorareve të krijuara nga transmetimi i shërbimeve dixhitale jo-interaktive. Në maj, ata, si dhe Agence France-Presse, kishin kërkuar nga një gjykatë e Parisit që të detyronte X të jepte të dhëna përkatëse tregtare dhe gjyqësori e mbështeti kërkesën.
Megjithatë, gazetat thanë, siç citohet nga Daily Telegraph, se rrjeti “nuk ka respektuar” vendimin, “duke demonstruar kështu dëshirën e tij të pandryshueshme për t’iu shmangur detyrimeve të tij ligjore”.
“Të ardhurat nga këto të drejta… janë një nxitje për pluralitetin, pavarësinë dhe cilësinë e medias, të cilat janë thelbësore për lirinë e shprehjes dhe të drejtën e informacionit në shoqërinë tonë demokratike,” shtuan ata.
Ndërsa X nuk ka komentuar ende mbi çështjen gjyqësore, avokati i tij këmbënguli në mars se faqja nuk ishte subjekt i të drejtave fqinje sepse përmbajtja mediatike nuk publikohet nga vetë platforma, por nga përdoruesit.
“Kjo është e çuditshme. Ata duan që ne t’i paguajmë *atyre* për trafikun në faqen e tyre ku ata bëjnë të ardhura nga reklamat dhe ne jo!?” Musk pyeti në gusht 2023.
