Donald Trump dhe ekipi i tij i tranzicionit po verifikojnë kandidatët që aplikojnë për pozicionet kyçe apo për të qenë pjesë e administratës së Presidentit të zgjedhur. Dhe duket se kriteri që po përdoret më së shumti është besnikëria.

Burime të njohura me procesin i thanë The Telegraph se Mike Pompeo, i cili shërbeu si drejtor i CIA-s dhe më pas Sekretar i Shtetit në administratën e parë të Trumpit, u përjashtua nga një rikthim i profilit të lartë sepse ai kishte “mbështetur në heshtje Ron DeSantis” në ofertën e tij presidenciale, në garën e brendshme të republikanëve.

Trump njoftoi në fundjavë se Pompeo nuk do të jetë në qeverinë e tij të re.

Trump po ecën fort në zgjedhjen e kabinetit të tij të ri dhe pozitat e larta në qeverinë e tij, ndërsa procesi është në kontrast të plotë me atë të 8 viteve më parë, kur ai u zgjodh për herë të parë President.

Presidenti i zgjedhur është mbyllur në Mar-a-Lago me këshilltarë që bëjnë zgjedhjet kryesore, si dhe qarkullojnë një sërë idesh dhe politikash.

Në mesin e këtyre këshilltarëve është Elon Musk, njeriu më i pasur në botë, i cili të martën u emërua të drejtojë Departamentin e Efiçencës Qeveritare (DOGE, akronimi tregon kriptomonedhën e tij të preferuar).

Figura të tjera kyçe përfshijnë Howard Lutnick, një financier miliarder, dhe Linda McMahon, të cilët bashkë-kryesojnë ekipin e tranzicionit.

Trump ka të drejtën e zgjedhjes së 4000 punonjësve.

Emrat e publikuar në ditët e fundit – duke përfshirë një shef shtabi dhe ambasador në OKB – ishin pjesë e punës paraprake përpara se tranzicioni të fillonte vërtet seriozisht.

The Telegraph shkruan se Trump mund të mos tërheqë më emërime të larta nga Dhoma e Përfaqësuesve. Edhe pse është nën kontrollin e republikanëve, ai nuk mund të përballojë të humbasë më shumë kongresmenë, gjë që do të krijonte zgjedhje të mëtejshme që mund ta vështirësonin qeverisjen.

Michael Waltz do të lirojë vendin e tij si kongresmen në Florida sapo të marrë postin e tij si këshilltar për sigurinë kombëtare, ndërsa Elise Stefanik, një përfaqësuese e Nju Jorkut do të plotësojë rolin e ambasadorit në Kombet e Bashkuara.

Ndër të mëdhenjtë që së fundmi kanë vizituar Mar-a-Lago është edhe Sylvester Stallone, ylli i kinematografisë.

“Trump tani e kupton se sa serioz është ky proces tranzicioni dhe nuk mund t’ua lërë të tjerëve”, raportojnë mediat, duke theksuar “ai është shumë më i fokusuar se herën e kaluar dhe merr vendime shpejt. Ai është duke biseduar me liderë botërorë. Këto nuk janë thirrjet e zakonshme të urimit, por biseda për politikat dhe për t’u siguruar që ata të kuptojnë se ai është në krye”.

Brenda Mar-a-Lago në një nga 126 dhomat ndodhen ndihmësit më të lartë të zotit Trump, që po shqyrtojnë dosjet dixhitale të atyre që kërkojnë një punë.

Kjo dhomë është e ngjashme me atë të krahut perëndimor të Shtëpisë së Bardhë.

Klubi privat i anëtarëve në West Palm Beach, Florida, do të jetë qendra e operacionit të zotit Trump deri në inaugurimin e tij më 20 janar.

Pallati i viteve 1920 u përshkrua më parë si “Shtëpia e Bardhë e Dimrit” për shkak të sasisë së kohës që ai kaloi atje gjatë muajve të ftohtë të katër viteve të tij të para në detyrë.

Zoti Musk ka qenë pothuajse gjithmonë i pranishëm në Mar-a-Lago. Aleati i Trump është fotografuar përkrah djalit të tij në resort dhe në pistën e Aeroportit Ndërkombëtar Palm Beach aty pranë.

Aq e rëndësishme është prania e Musk në krah të Trump, saqë ai i është bashkuar telefonatave me liderët botërorë, përfshirë Volodymyr Zelensky të Ukrainës.

Ndikuesit konservatorë Charlie Kirk dhe Vivek Ramaswamy, të cilët kanë secili miliona ndjekës në mediat sociale, gjithashtu janë pjesë e takimeve. Të martën, Ramaswamy u shpall si bashkë-drejtues i departamentit të ri të efikasitetit së bashku me Musk.

Dana White, presidentja e UFC, e cila iu bashkua Trumpit në skenë gjatë fjalimit të tij të fitores, është parë në The Breakers, një hotel që kushton gati 2,000 dollarë në natë.

Insajderët thonë se zoti Trump po përpiqet të ndërtojë ekipin e tij të lartë si një startup i Silicon Valley, i mbushur me biznesmenë, influencues të mediave sociale dhe të huaj.

Një burim i afërt me bisedimet i tha Politico-s se ekipi i tranzicionit “po tërhiqte njerëzit më të mirë për të dhënë ide, pavarësisht titujve”.

“Ka energji pozitive, kreativitet, hapje ndaj ideve,” shtoi burimi.