Policia e Tiranës ka bërë reagimin e parë pas atentatit që u regjistrua në rrugën “Faik Konica”, pranë Fakultetit Histori-Filologji, në kryeqytet.
Nga të shtënat rreth orës 23:00 mbeti i plagosur 52-vjeçari Eduart Reçi, biznesmen me origjinë nga Dibra.
Zona ku ka ndodhur ngjarja është mjaft e frekuentuar dhe e monitoruar nga kamerat e sigurisë së bizneseve përreth. Dyshohet se momenti i atentatit është filmuar.
Ndërsa në reagimin e parë për mediat, Policia e Tiranës sqaroi se i plagosuri ndodhet në spital në gjendje të rëndë shëndetësore. Pasi ka qëlluar biznesmenin, autori është larguar menjëherë, ndërsa dyshohet se drejtimi i lëvizjes së tij ka qenë Parku i Liqenit Artificial të Tiranës.
Tiranë/Informacion paraprak
Më datë 13.11.2024, rreth orës 23:00, në rrugën “Faik Konica” është plagosur me armë zjarri shtetasi E. R., 52 vjeç, i cili aktualisht ndodhet në spital, në gjendje të rëndë shëndetësore.
Një grup i posaçëm hetimor, nën drejtimin e Prokurorisë, vazhdon punën për sqarimin e rrethanave të ngjarjes, identifikimin dhe kapjen e autorit/ëve të dyshuar.
Informacion më të detajuar mbi këtë ngjarje do të japim në vijim.
(BalkanWeb)
