Ukraina ka mohuar të ketë ndonjë plan për të zhvilluar një arsenal bërthamor për të frenuar Rusinë në rast se fluksi i ndihmave ushtarake amerikane do të mbarojë.

Të mërkurën, The Times raportoi se zyrtarët në Kiev besojnë se mund të krijojnë shpejt një bombë atomike me bazë plutonium të ngjashme me atë që SHBA hodhi në Nagasaki në 1945, duke sulmuar objektet e energjisë bërthamore të Ukrainës për të marrë materiale të zbërthyeshme.

“Krijimi i një bombe të thjeshtë atomike, siç bënë Shtetet e Bashkuara në kuadrin e Projektit Manhattan, nuk do të ishte një detyrë e vështirë 80 vjet më vonë,” thuhej në një dokument nga Qendra e Ukrainës për Studimet e Ushtrisë, Konvertimit dhe Çarmatimit, cituar nga gazeta britanike.

Sipas dokumentit, ndërsa pajisjet bërthamore nuk do të ishin veçanërisht të fuqishme, Ukraina ka material të mjaftueshëm “për qindra koka luftarake me rendiment taktik prej disa kilotonesh”. Kjo do të mjaftonte për të “shkatërruar një bazë të tërë ajrore ruse ose instalime të përqendruara ushtarake, industriale ose logjistike”, shtoi dokumenti, siç citohet nga The Times.

Raporti vjen mes shqetësimeve të përhapura në Perëndim dhe në Kiev se presidenti i zgjedhur i SHBA-së, Donald Trump mund të shkurtojë ose të ndalojë plotësisht ndihmën ushtarake për Ukrainën pas marrjes së detyrës, pasi vendi i goditur tashmë po përpiqet të frenojë përparimet ruse në fushën e betejës.

Megjithatë, zëdhënësi i Ministrisë së Jashtme të Ukrainës, Georgy Tikhiy, ka hedhur poshtë pretendimet se vendi mund të kërkojë armë bërthamore. Në një deklaratë të mërkurën, ai theksoi se “Ukraina është e përkushtuar ndaj NPT”, duke iu referuar Traktatit të vitit 1968 për Mospërhapjen e Armëve Bërthamore.

“Ne nuk posedojmë, zhvillojmë apo synojmë të marrim armë bërthamore. Ukraina punon ngushtë me IAEA dhe është plotësisht transparente për monitorimin e saj, i cili përjashton përdorimin e materialeve bërthamore për qëllime ushtarake”, shtoi ai.